《快車期頻頻送分 車路士對阿士東維拉賽後分析》
.
明明問題都係果啲 但唔知點解愈打愈多字🤔🤔🤔
.
繼上場作客阿仙奴全失三分過後，今場回歸主場迎戰阿士東維拉，喺領先後一直未能射入第二球保險波，結果被追平再次失去兩分，走勢上球隊似乎已跌入失分旋渦，而睇返近兩場失分賽事所面對既問題都大同小異，但眼見林伯特實在未有太多嘗試解決既辦法。
.
快車期間，林伯特喺今場波作出左多個位置輪換，防線上除左門將既文迪以及左閘捷維爾外，其餘三個位置分別都作出變動，艾斯派古達頂替列斯占士為正選，而中堅組合選用魯迪加拍基斯甸臣，中場方面選用佐真奴配合簡迪以及蒙特繼續維持三中場，至於前線方面由基奧特領軍，左右攻堅拍檔分別係佩利錫同奧岱，而添姆雲拿終於得到休息機會先列後備。
.
以場面上黎睇，感覺上維拉先似係打主場果隊，雖則依加喺缺少球迷之下基本上主場同作客都無太大分別，相比於車路士既前場壓迫，維拉所實行既壓迫戰術更為主動同貫徹，至少人地係有實際成效，務求即使拎唔到個波都想將佢有咁後壓咁後，同時緊扣住車路士兩翼空間，避免釋出更多空位比佢地接應長傳，相反林伯特所做既迫搶都依然係無乜組織性，繼續以「偽」逼搶為題，同時最多只有兩名球員合作壓迫，完全收唔到應得成效。
.
再加上喺後場缺少左堤亞高施華底下，後場抗壓能力薄弱，基本上對手一施加壓迫，魯迪加、基斯甸臣等人都只能短傳或無目標下大腳斬上前場，將控球權拱手相讓，亦變相加大左對左閘捷維爾既負荷，因為防線上亦都只有佢有能力出到波；再講到中場配置，承接上面所講喺施華缺陣下，林伯特希望利用佐真奴作為控場者，但構思想像同真正實行有機會係兩回事黎，喺後場受壓下基本上好少波會經由中場發板，而即使佐真奴有機會控球在腳下，對手防線已經緊迫住前場球員，完全收窄左可以長傳既選擇。
.
至於另外兩名拍檔簡迪同蒙特，雖然為球隊中場提供到硬度同活力，但前者明顯出現疲態，面對住擁有身形優勢既麥堅（John McGinn）時都難免要動用到技術犯規阻擋對手，而蒙特亦征戰連場，即使係愛將唔洗正選輪換亦理應需要其他球員後備入替，尤其係近兩場波高華錫所參與既時間係四名常任中場之中最少既一個，亦見唔到今場波喺仲有一個換人名額下有咩理由會連一分鐘出場時間都無。
.
再講到既就係前場方面，外界過度著眼於德國雙星近期既劣勢，請容許筆者於其他文章再談，但單計哩場波的話佩利錫所浪費既機會亦都唔少，多下黃金入球機會都未能把握得到，老實講戰術套路只能夠為球員們製造起腳機會，最後把唔把握得到都要依靠球員既，而基奧特亦繼續交出以身作則既表現，相反較少人談論奧岱今場波既付出，多下快速長傳轉邊、走到左路與佩利錫overload一條邊路、具威脅既傳中等，奧岱所交出既表現可以話暫時延緩左球隊對薛耶治既需要，而個人認為佢至係今場既Man of the Match。
.
連續兩場賽事失分，無疑林伯特所受到既壓力亦愈黎愈大，佢喺賽後亦有指出球員既表現已經再不能要求付出更多，的確既係以哩兩場賽事黎講，除左對阿仙奴既上半場全隊發夢唔知打緊乜之外，其餘時間都係水準之中，機會唔係無但一直都唔能夠穩定地將個波放入網內，不過林伯特身為主教練亦有責任喺球隊陷入低潮時作出改變，尤其係喺哩套戰術需要球員們高強度既體能付出之下，快車期既消耗就只會與日俱增，喺戰術上實在需要有更大限度既妥協同取捨。
.
《岩睇既比個Like支持我地啊！》
作者 : BluexLion車迷手記
-------------------------------
同場加映《令車迷們「瘋狂」的一個暑假 淺談藍軍大灑金錢的一個轉會窗 – 中前場篇》
https://bit.ly/3esVUMS
.
#Chelsea #車路士 #阿士東維拉 #英超
https://s.fanpiece.com/ikzQEdk
