［卓悅賣盤？其實係轉手］香港人同內蒙政協，邊個過邊個一楝都係未知
1. 當然賣盤同轉手兩者實際有乜分別幾複雜，大家好多時日常用字都唔會太精準。
2. 但可以話你知嘅係：呢壇嘢冇新人物登場。只係大股東二股東轉個莊
3. 可以比較下，例如之前講Tiffany 賣盤，就真係成間畀咗外人。或者之前講嘅咩永隆賣畀招行，譚仔賣畀丸龜，都係咁。
4. 今次呢壇，有啲唔同。全部都係舊人物，existing players。雖然其中一個舊人物都幾新（up 乜?）
5. 好，大約4年前，2016年1月講起，蘋果有報（http://bit.ly/2Sc3uRl）。
6. 簡單嚟講，卓悅大股東就係葉俊亨夫婦。原本渣五成幾。然後2016年1月，佢地減持咗，套現3億，賣咗16%股權，接貨嘅係個陌生名字，陳健文。內蒙政協喎。當時話靠佢打通內地市場云云，真假成敗都不重要。陳健文拎咗16%，自然變咗執董。但計算都知葉氏夫婦仲渣近40%，仲係大股東，雖然唔過半
7. 4年後嘅今日，就係陳健文，買埋葉氏夫婦嘅股份咯。買完佢就當然係大股東。而當然啦，佢最新渣到19.5%，咁食埋葉氏夫婦手貨，渣到上近60% -就梗係要 GO – 唔係圍棋唔係電車GO，係General Offer．其實係MGO，M 同 MPF個M一樣，強制，一定要做
8. 實務上即係點？即係陳生買得葉生手貨，就要用至少同樣嘅價買埋其他小股東嗰啲。如果冇呢條例佢咪可以好低價拎到間公司控制權（然後私下回佣畀葉生，just saying）甚至私有化？冇得咁狗嘅。
9. 但當然啦，都未出價，中間亦有一大堆好似廢但重要嘅字眼，未有任何正式或非正式承諾，可能發生或可能不發生，都係要披露的。廢？都唔係。如果真係坐低簽咗嘢就不能咁寫，否則冇事就冇事，有事就監都有得坐，虛假陳述噃。
10. 咁邊個過邊個一楝？定係攬炒？就等其他高人分析。講真我都唔係好熟呢間公司或呢班友或呢行。
11. 但想講嘅係，當年葉氏手貨畀陳健文，係5毫半子。而家股價？你試下行出去窗口望吓，睇吓望唔望到大嶼山？大嶼山就冇啦，股價停牌前，1毫子，仲其實避開咗年初五肺淡大跌市，聽日復牌
12. 咁係咪葉氏夫婦過蒙古一楝，蒙古佬高位接貨即潛水？原本好似係，而家就未必係。而家跌到1毫子蒙古佬先買起你成間公司喎，當然應該有溢價（唔係冇嘛？），但，斷估都唔會貴得過佢5毫半第一手貨
13. 咁到底其實係葉氏夫婦金蟬脫鼓一早知道冇得做先沽畀你條傻仔，定係葉氏夫婦引狼入室敗咗自己家業？就唔知了。但，比較似係前者。因為2015年尾卓悅都出過公告講有機會大股東賣走（http://bit.ly/2RzpFBJ），最後就係2016年1月陳健文單嘢。—就唔係忽然爆呢條友出嚟敵意收購的
14. 再講一次，眼訓，兼唔熟，而且好耐冇溫上市規則書，應該有錯，插還插唔好咁大力。
