【 #50後生活小貼士 】抗疫期間 買咩蔬菜最襟擺？
抗疫期間，大家都多咗煮飯，我相信其中一個最困擾 #50後 嘅問題就係買餸。出街風險咁高，大家都盡量減少外出次數，但係一次過買幾日嘅餸真係好難，特別係好多新鮮蔬菜保鮮期有限，擺幾日就會變壞。今次我哋綜合咗十幾款常見又襟擺嘅蔬菜同佢哋嘅保存方法俾大家，希望可以喺買餸嘅時候幫到手～～ 如果大家有買開又襟擺嘅蔬菜，又或者其他蔬菜保鮮方法都可以喺留言位置推薦俾各位 #50後 呀！
－ 可以擺放3 - 5日：
萵筍：將啲葉摘咗之後，唔使刮皮放喺保鲜袋內再放入雪櫃。
黃芽白：先摘咗外層發黃唔新鮮嘅葉片，切開一半將芯部切除，再用保鮮膜包起放入雪櫃。
西芹: 搵錫紙包住，再放入雪櫃，邊位無需壓得太緊，避免水分流失之餘又可以保持通風。
－ 可以擺放1星期左右：
彩椒：避免沾水，直接用膠袋裝起放入雪櫃。
西蘭花 & 椰菜花： 唔好預先切，全棵用保鮮紙包起放入雪櫃。
茄子：包一層保鮮紙再放喺陰涼處。
－ 可以擺放1－2個星期：
椰菜：先用菜刀挖走菜心，塞入微濕但唔滴水嘅廚房紙，再裝入保鮮袋內就可以放喺雪櫃1－2星期
洋蔥 & 蘿蔔：無須放入雪櫃，只要保持乾燥放置喺陰涼通風處就可以。
－ 可以擺放1個月左右：
南瓜：未切過嘅南瓜成個擺係通風陰涼嘅地方可以保存一個月左右。不過如果切開咗，就要將啲核撥走，再裝入保鮮袋內放入雪櫃，大約可以保存一個星期。
蓮藕：首先將清洗乾淨嘅蓮藕放入保鮮盒內，再倒啲清水入去，水要蓋過蓮藕，兩三日換一次水，就可以令蓮藕喺一個月內保持新鮮。
豆角： 將豆角洗乾淨，兩邊嘅頭部可以摘咗佢，再切開一段段，然後用滾水淥一淥，最後放係陰涼地方吹乾。豆角乾咗之後就可以用密實袋裝起放入冰格內儲存。呢個方法聽落好麻煩，但係佢唔會破壞豆角嘅味道，同埋就算一個月後先煮都可以保持翠綠。
資料來源：綜合報道
—————————
馬上Like and Follow 港式50後，緊貼50後生活資訊!
#抗疫錦囊 #買餸貼士 #生活小貼士 #儲存蔬菜 #生活小智慧 #港式50後 #50後生活
——————————————————
【抗疫錦囊】消毒要全面 6個隨身用品消毒指南
https://bit.ly/30LOrSB
