長大之後，先會學識欣賞農夫。
細個唔知呢隊組合喺度Rap咩，無韓仔嘅小白臉外貌，無太特出嘅歌喉，所以一直無乜點留意。
直到長大後，先發現自己走緊寶，講内涵同歌路嘅不同，簡直係香港組合最Top之一。
講社會，有《港女收港男皮》講兩性社會現象，當中《十七年華》簡直係超高質之作，短短幾分鐘諷刺晒社會各階層逼死少女、傳媒對真相嘅漠視、香港人關心新聞只有三分鐘熱度等。
講愛情，有《阿遲》講初戀到長大嘅戀愛；有《好彩分手》去安慰受傷嘅你。
講長大，有《返老還童》、《難得咁人齊》、《我要打多支》、《Old School Days》等，當中《偉大航道》最高質，以自身嘅經驗去勉勵青少年。
講夢想，有《我的志願》、《重新找到你》等，《重新找到你》更加係打工仔嘅心聲，日日機械性咁返工，無咗自我，忘記咗自己理想。
我諗係人長大之後，當生活面對唔少挑戰同挫折先會明白農夫嘅歌。曾經細個會以為世界係自己，以為社會係需要自己去幫助，但大個發現原來唔畀社會淘汰已經算好，第一次接觸社會嘅殘酷。真正體會係喺香港實踐自己嘅理想係一件幾咁困難嘅事，你要生存容易但生活真係好難。
但農夫啲歌好多時就不斷正面鼓勵你唔好俾社會埋沒自己，唔一定人做你就要做，最緊要有自己思考，行自己嘅路。
當世界風向同樂壇都轉緊去國語，佢哋話一定堅持做廣東話歌，希望廣東歌可以代代相傳。《表演者》、《456 Wing》、《全新派台作品》呢啲歌都睇得出佢哋行樂壇路係捱出嚟，永遠用搞笑去鼓勵人，希望有更加多人聽佢哋嘅歌。
#famahk #農夫
