（承上回，喜歡請給個like吧！）
事隔幾年，重想回這件事，仍是有一種難以言喻的感覺。在這個時候、這個環境內，更覺難受。兩三年後，事過境遷，再寫回這個故事，還是一次面對自己的成長過程吧？一生人中，誰沒有收過「朋友卡」？
Ch.26 感情幻滅 (Part 1)
那．．．到底怎樣？我駕著單車，腦袋一片空白地向前移動。這算是拒絕了嗎？我老早預備了一大堆說話，臨場果然沒有機會說。
我漫無目的地踏著單車，早已不知自己駕到甚麼地方。待電話震動時，我才發現自己已到了接近高速公路的地方。
天呀，這是甚麼地方？
晴晴發了我們在餐廳的照片給我，並說：「Thanks for the happy nite!」未幾，她續說：「其實我知啦！都好耐啦可？」原來，她老早知道。
晴晴沒有拒絕或答應我，留下了這句說話，仿佛靜待我的回覆，既然沒有機會親口說，我把單車停在一旁，決定把一直以來的心底話說出口：「嗯．．．都兩年喇！其實之前送幅畫俾你果陣都已經想講，但係你之後就咁避足我十個月。其實我嚟澳洲都係因為太唔開心，想忘記你，點知上次Melbourne見返你之後，我知道原來我仲係好鐘意你，根本就放低唔到你。我覺得同你做乜講乜都好夾，由大學以嚟一直都係！可能我成日搵你，你會覺得我好煩，其實我真係好掛住你，有咩事都想第一個同你分享，見到你病見到你唔開心，都好想第一時間關心你，知道你發生咩事。老實講，我做咁多野今晚嚟到，都真係好想同你講出呢一番話：我真係好鐘意你。你可唔可以考慮下我、俾個機會我？我會對你好好架，你識我咁耐，都知我唔係一個玩玩下嘅人啦，我對你會真心架．．．」
按下「傳送」鍵後，我大抵已知道了結果，淚水不期悄然落下，我續說：「其實我讚你靚唔係口花花，我講真架！一直以黎，我好鐘意見到你笑，有時俾你串我，我扮傻架姐，我好鐘意睇到你串贏我之後果個樣，我覺得好可愛．．．」
我就此站在路邊等著，晴晴一直沒有回覆我。兩旁偶爾只有一兩輛汽車經過，令氣氛倍感蕭瑟，我一邊緊張地期待著，一邊覺得自己真要快點回去才成。否則，我生怕晴晴給我一個接受不來的回覆，以此狀態下會發生意外。入夜後的街道不太好走，那刻我已緊張得已無力氣去搜尋GPS，順著自己的方向感而行。電話在我褲袋中震動，我深知晴晴回覆了，但是我不想拿來看，我生怕情緒崩潰後真會撞車或迷路。
漆黑中，我終於找到了房子。走進空無一人的屋子內，我跑入房間，關門，拿起電話，鼓起勇氣，面對晴晴的回覆：「其實我果時估到所以先有心避你，因為之前完全冇諗過你會鐘意我囉！但係對唔住呀，我係睇有冇感覺．．．我覺得同你係做朋友嘅感覺．．．」
這大抵是我預料到的結局，沒想到真的來臨後，我竟也是接受不來，淚水不斷掉下來。在這空洞洞的房子內，這種感覺真難受！我仍作最後掙扎：「真係全無機會呀？」晴晴沒有理會我的問題，有些事情大抵不用明言也可以了：「坦白講我真係好開心有你呢個fd！好岩傾同埋睇完戲有咩唔明好唔好睇，我第一個都想搵你傾！不過，之後feel到你有野就唔敢搵你．．．」
說得這樣，我還可以怎說下去？這一刻，我很想放聲嚎啕大哭，反正這是一家有如空置的大宅，誰會知道我這麼尷尬？但是，原來一個人到傷心絕望處，竟會欲哭無淚，胸口有種快將撕裂的感覺，我只覺難受極了：「其實我果陣好傷心，我甚至驚呢世都唔會再見到你。」此話亦是這刻的感覺。
「唔想你諗多左，我好想返返以前大家好fd嘅日子呀！我不斷諗我係咪做錯咩俾左咩wrong signal你，因為我之前深信我地係絕緣架！」
「你冇俾過．．．」那刻我已不知道可以說些甚麼了，我猶豫了很久很久，才按下「傳送」鍵，續說：「其實，我好耐之前已經對你有好感，後尾去到白泥果日，我先知自己真係鐘意左你。或者咁講啦，之前你有男朋友我冇乜諗野，但後尾估唔到我真係鐘意左你，仲要係我咁一個都未試過咁鐘意一個人。」
「多謝你」大抵，晴晴也不懂怎樣回覆下去了。
「真係冇得考慮？」
「可見嘅將來真係冇！對唔住！」
「同埋我想講，你兜口兜面表白好勇好叻仔！」
「我真心想同你去番以前咁fd，所以一定要講清楚！」
「其實，你一直冇覆我，電話又唔聽，我已經知衰左。我一直呃你冇避我，直至日本大地震，我好擔心，你一直唔覆，我真係諗住你發生咩事，直至我見到你update安全，我先肯定你係避緊我．．．果次，我真正感覺到自己同你involve入一場災難入面，我擔心到痴線。不過冇啦，係直至後尾返到Melbourne先咩感覺都返返黎」我沒意識地、半夢半睡中按下了這些句子。這一年來的無盡思念、觸發過的傷痛和低落，一下子也說給晴晴聽。
「咁其實係咪應該唔搵？我見好耐冇見丫嗎」
「唔係呀」
「其實果日係我半年嚟最開心一日」
「Thanks ar」
「咁我仲有冇機會見返你？」
「有！好朋友？」
人世間最痛苦的事，莫過於多儲一張「朋友卡」。尤其是，當你愛上了自己最好的朋友時，收到這張「朋友卡」的機會，大抵亦會以倍數上升。
「講真，我唔敢講我做到，始終都搞左兩年」
「慢慢」
「你ready做返fd咪搵返我囉！我訓喇gd nite」
晴晴簡單地拋下一句「Gd nite」，反令我難受之極。
誤以為能夠承受到的，原來有些真相被揭穿後，那種煎熬與痛苦，卻是如斯刻骨銘心；誤以為被拒絕已成定局，原來這非自己所想般豁達，到最後，心還是很痛。
一直欺騙自己、，一直自甘樂於其中、一直跟自己說，這樣子的關係也不錯、一直安慰自己能夠見到晴晴已無憾，事實又是否這回事？從美夢中清醒過來，發現這一切不過是腦海中虛幻的泡影，幻影這天突然就此消失，兩年的美夢與目標瞬間流逝，我一下子仿佛被掏空了。做朋友，談何容易？
我腦海中一片空白。
這家空洞得有點詭異的空房子，除了窗花劃過的微風外，我聽不到有任何聲音。我走出大廳，希望那詭異的「鄰居」會走出廳堂，哪怕只有一個人，可以跟我隨便說任何說話也好。在那漆黑一片的大堂中，一個人也沒有。我發現眼淚不經意已流乾，很口渴。我亮著廚房的燈，骨碌骨碌地喝下了一杯又一杯清水，並打開水龍頭把清水撥到臉上，希望讓自己清醒過來，原來，這也沒有用的。大概，晴晴仍是我最愛的女人，那份傷痛，難以言喻。
