相信接觸過性/別理論嘅朋友應該常常接觸「性別認同」呢四個字。每個人都有形容自己嘅方式，有一啲人會用「男/女」、有啲人會用「非二元」、「流動」、「酷兒」、「唔男唔女」等等嘅字眼。隨着我哋長大，不斷摸索、體驗、感受，而慢慢確立現階段嘅性別身份，當我哋追尋「做自己」呢一個目標嘅時候，背後有啲咩因素係影響緊我哋嘅性別認同呢？
首先（係廢，但都係要講）條件當然就係你個身體啦。
身體係我哋同人交流最直接嘅實物，身體呈現出嚟嘅外表，以及同其他人嘅差異，都係造就性別定型（例如假設對方係咩性別），繼而理解對方嘅第一步、最原始嘅條件。
我哋一出世就會被判定成為某一種性別。呢一種完全被動嘅性別認同就係靠當時個醫生睇你胯下而決定。喺出現第二性徵嘅時候，因為生活環境、染色體、荷爾蒙等嘅因素控制住我哋內外器官嘅發展。我哋會見證住自己五官嘅輪廓、脂肪比例同毛髮嘅增長，有啲嘢會生多啲，有啲嘢會生少啲。所以身體嘅轉變就係奠定我哋探索或者疑惑自己性別身分嘅重要一環，軀體就係我哋做開始嘗試同轉變性別表達嘅地方。
講到轉變，當然包括我哋點樣慢慢塑造自己嘅性別表達啦。
性別表達，即係我哋嘅言行舉止、衣着髮型、興趣行為都係表達緊自己嘅性別。話雖如此，外在嘅表達往往會受制於自己內心嘅安全感同埋接受程度而改變。所以即使係同一個性別認同嘅族群（或者角色），都會出現性別表達不一致嘅狀況。舉個例，有人以為TB就一定係短頭髮，但都有人一頭長髮，同時認同自己係TB；一仔都好肌肉型，都有走bitchy風嘅一姐。
呢一種概念落差就係我要講嘅第三個因素 - 社會觀點。
我哋身在嘅社會、文化、宗教、習俗都不斷咁影響緊我哋對性別身份嘅想法。我哋成日講話着裙就係「陰柔」，但係參考其他文明例如古羅馬，男性會着無褲檔嘅長袍嚟表達自己陽剛嘅性別氣質；十四、十五世紀嘅歐洲都會有男性著長襪吊襪帶。即使喺亞洲、太平洋同非洲地區，都會有男性著裙嚟做民族服飾。
當其他人靠衣着同埋行為認知自己，喺呢個雙向嘅互動之中，不時會同自己想表達嘅訊息有出入，而造成誤會、尷尬、甚至係唔舒服嘅情況。呢個狀況對於跨性別或者性別流動嘅朋友比較明顯，尤其係被呼叫性別稱謂嘅時候。好多時人嘅本能就係靠睇樣同人社交，依靠自己對性別嘅理解而作出直覺判斷。一層層直覺嘅判斷，你點睇人，同時都點睇自己，都會構成自己性別表達嘅一個改變因素。
要從社會觀點開始倡議多元性別，唔係就咁叫人「唔好假設對方男定女」，甚或「叫錯名就大大矱」，因為對方聽咗都唔知道要點做，加上誤會，可能會造成更多對立面。蓄意嘅冒犯應該係對方明知你嘅性別認同，都仍然刻意重複叫一個唔恰當嘅稱呼。
不如諗多一層，準備點樣同對方講自己點解聽咗某啲字眼會唔好受，係咪對方嘅習慣語言同自己唔同。例如，廣東話對所有性別都通用「佢/他」同「你」，無用女字邊嘅「她」/「妳」唔等於英文中用錯pronouns咁。
仲有啲咩可以做？
鼓勵更多人初次見面時可以問多一句「你點稱呼」，或者建議一啲直接、通用嘅不分性別稱謂，例如「朋友」、「參加者」、「使用者」、「同學」之類。
你仲諗到有咩方法呢？下面留言話俾我哋知啦！
//
撰文：馬天娜 @mtna.sc
圖源： @glsen 、互聯網
#pridelab #pridelabhk #BeTheChange #馬天娜 #所有性別 #性別表達 #hklgbt #性別多元
