《天下無雙》中的「緣定」
—
「好多時候，愛一個人愛得太深 ，個人會醉。恨得太耐，個心就會碎。但係最痛苦嘅，莫過於等待。我唔知道佢等咗我幾耐，我一直以為我唔會再有機會見返佢，突然之間我唔知點開口，我唔知點講第一句說話，好想話比佢聽，我真係好愛佢。」李一龍《天下無雙》
—
梁朝偉因為通過唔到龍鳳指環嘅考驗，所以無辦法同無雙公主王菲喺埋一齊。一段感情入面兩個人往往會遭遇到好多不同嘅問題，例如喺《天下無雙》入面，因為性別，因為階級同地位，因為李一龍無辦法贏到某啲測試，根本唔係公主「緣定嘅夫君」。
—
故事嘅最後，王菲要「被」嫁到塞外，憂思成疾疢，有幾大嘅愛，就有幾大嘅恨。梁朝偉鼓起勇氣去搵番無雙公主，最後終於喺桃林度搵返心上人，但係佢完全唔知點開口，完全唔知可以點樣去表達自己對於對方嘅愛。
—
愛其實係咪可以跨越一切嘅問題呢？公主仍然係公主，梁朝偉仍然係小霸王。但因為愛，王菲選擇放棄自己公主嘅身份，喺桃林度等李一龍；而又因為愛，梁朝偉話自己好似已經變咗第二個人，甚至話自己係女人。原來真心愛一個人，係可以令你徹底，甘心情願地轉變。
—
當梁朝偉搵番王菲嘅時候，發現無雙公主已經變成咗一個自言自語，沉溺喺幻想世界嘅可憐人。係咪見到一個人嘅好，所以你就愛佢，而如果見到一個人嘅壞，就要遠離呢？你必須要接受一個人嘅壞，先有資格享受一個人嘅好，金無足赤，人無完人，愛一個人並唔係愛一個人嘅條件，而係愛一個「人」，接受當下，力求完美。
—
但既然「愛」未必可以解決到所有問題，咁仲有咩「用」？最大嘅意義在於，愛賦予咗我哋勇往直前，直視困難嘅勇氣，呢個相處模式唔得，咪傾過第二個囉，正如梁朝偉果隻會甩嘅龍鳳戒指，原來交換戴又OK喎，世上嘅難事，都只怕有心人。
—
係咪真係有咁多「緣定」架呢？發夢果陣可能會有嘅...
