睇完《Superman Vs. Batman》。好彩事前睇見劣評如潮，所以調低咗心理期望走去睇，結果感覺都唔係好難受：大家要明白我對呢套電影期望超大，唔係因為超人大戰蝙蝠俠，而係在於佢係我最鍾意嘅導演之一Zack Synder嘅作品。
先警告大家，有得揀真係唔好睇3D，因為成套嘢用色果種陰沈同3D效果係極唔夾，睇得非常辛苦──其實都唔明，明明《戰狼300續集》都係黑炆炆，但效果做得好好多。同埋真正有一種立體感係要去到最後一場打鬥先有，亦唔係特別突出，完全係無必要加錢走去睇。
至於劇情，其實主要係同Avengers系列面對同一個問題：因為要花太多時間走去刻劃兩個主角嘅故事，之後又要分條Line去講下奸角，結果彼此之間交集反而唔多，自然中間就會有啲悶場。又Zack Synder本身嘅強項就係運用鏡頭剪接去帶出人性同世界各種陰暗面，但當見倒佢啲慢鏡走哂去拜山、發夢，但同劇情推進又無乜關係，真係浪費哂。
本身我都幾鍾意呢個故仔一開始連接住《Man of Steel》呢個設定，好實在咁營造倒蝙蝠俠對超人嘅仇恨，而用Martha呢個母親英文名嘅共通性去作為冰釋前嫌嘅原因亦非常有心思──問題係中間嘅關係同衝突實在處理得一蹋糊塗，完全營造唔倒果種迫力，兩條友互抽嘅理由更是on9。見倒唔少影評話為咗顧及到無睇《Man of Steel》或者唔熟識Batman同超人嘅觀眾，所以某啲說明式劇情係無可厚非，但大佬，香港會有咩人對呢兩條友一無所知呀？當你啲背景竹介紹極唔吸引果陣，我寧願你無頭無尾，比多啲時間去比兩條友做對手戲仲好啦！
見倒Ben Affleck因為套戲劣評如潮，所以響訪問果陣灰到喊出黎真係好可憐，其實我覺得成套戲入面做得最好就係佢，佢面形果種狙獷線條其實先最符合原著蝙蝠俠果種設定──唔係話Christian Bale做得唔好，不過佢只係Christopher Nolan嘅御用Batman，但講到最有DC果種味道嘅，始終都係前者。
至於Henry Cavill，老實講之前《Man of Steel》見佢擠眉弄眼式演繹已有啲反感，今集唔知係咪基於Zack Synder對佢嘅偏愛又比咁多文戲佢演，結果就成為悶場一大來源。最大問題係女主角Amy Adams一啲都唔靚仲要成日出場扮索女，好心就比Wonder Woman Gal Gadot出多啲啦！起碼養眼啲！至於扮演傻仔嘅Jesse Eisenberg，我唔會話佢做得唔好，甚至果陣扮Suckerberg時候我係對佢有好好嘅印象；問題係Lex Luthor呢個角色響套戲入面其實係可有可無，純粹係製造一個Batman同Superman嘅共同敵人，咁老實講，就唔駛花咁多時間去舖排佢啲背景同陰謀（即使佢響漫畫入面其實係有舉足輕重嘅地位），等劇情緊湊一啲啦。
其他角色無乜特別想講，反正好多都熟口熟面響《Man of Steel》見過（所以呢套其實係《Man of Steel》續集，只不過無打個名上去），唯二想講嘅係，做Rex助手嘅岡本多緒好索，索過范冰冰之流；同埋Jeremy Irons，繼《Margin Call》之後，又見倒佢了，今次做蝙蝠俠管家風采依然！
不過真真正正令我失望嘅，唔係劇情，反而係打戲。相比起《Man of Steel》果種開創性，《S vs B》嘅動作場面真係有啲失望；首先最期待果場Batman vs. Superman，其實最精彩果啲已響Trailer睇哂；響呢個連B級片都打到飛天嘅荷里活，你竟然仲響棟樓入面仲間房打，真係有偷雞之嫌，而且兩邊互抽亦唔緊張；去到最後，竟然變撚咗魔戒出隻半獸人出黎？Are you kidding me？喂《Man of Steel》雖然有啲亂，但起碼係真人版龍珠，你《S vs B》竟然倒退番去Marvel當年扮大片嘅B級英雄片時代，一味靠綠幕扮大場面，蝙蝠俠仲要變路人，而超人亦係死得不明不白，真係一個屌字都形容唔倒……
總括黎講，《S vs B》又未致於《Avengers 2》咁爛，甚至乎我覺得好睇過1，不過如果要拎黎同Zack Synder其他作品比，就真係連《Man of Steel》同《Sucker Punch》都好佢成條街，亦完敗比之前一堆Marvel電影。然後聽講仲會有Justice League上下集……不如將佢轉做兒童動畫版啦，可能Zack Synder仲會拍得好少少，我唔想失望多兩次。
