所有人都叫我去死（下）
上集：https://bit.ly/3lruCf9
我冇諗過，有人可以冠冕堂皇，大大聲咁叫另一個人去死。
我趕走咗佢哋，然後，我個新抱望實我，深吸一口氣：「其實我哋屋企嘅糧食，真係唔多夠。」
我個仔一手捉住新抱，狠狠刮咗佢兩巴：「你叫我老豆去死啊？你係咪痴線㗎？」
我都有少少安慰，好彩，我辛苦教養出嚟嘅仔，仲係有人性嘅。
但自從嗰日之後，我無論去到邊，都聽到村民或明或暗嘅嘲諷。
人人都問我點解唔自殺，點解唔將糧食留畀青壯年，既然條村已經咁艱難，我點解仲要為咗一己私慾而生存……
連十歲嘅小虎都問：「陳爺爺，我爺爺都死咗啦，點解你仲未死嘅？」
佢用最天真嘅眼神，講出最殘酷嘅話語。
坦白講，我都唔係冇感覺嘅木頭人。
人人都咁同我講，我都會難受，喺情緒最低落嘅時候，我都有諗過，係咪應該上老人山，一死了之。
但我又唔甘心，點可以為咗呢班愚昧嘅群眾，放棄自己嘅生命？
跟住落嚟嘅事，愈嚟愈令我毛骨悚然。
又一個老伯喺老人山上吊頸自殺，或者你會講，唔係好尋常咩？
但呢個老伯係瘸嘅，平時出去散步都要人扶，根本冇可能自己爬上山，再自己上吊。
但所有村民都一致地冇質疑呢個問題，而係高聲讚揚佢嘅「偉大貢獻」，為條村「自我犧牲」。
我返到屋企，我個仔同我講，話呢排糧食少，個孫愈嚟愈瘦，驚影響佢發育。
我擺擺手：「咁我哋再食少啲，留番畀啲細㗎啦」
阿仔突然用一種希冀而又為難嘅目光望住我：「係啊，就算我唔食，老婆仔女嘅都要食。」
我嘅警惕心瞬間去到極致：「你係咪叫我去死？」
嗰一刻，阿仔居然迴避我嘅目光。
依加佢只係暗示我去死，時間耐咗，糧食愈嚟愈少，我會唔會好似瘸嘅老伯一樣……
我又驚又嬲，衝咗出門口。
行吓行吓，我就去到河邊。
我見到小虎喺水裡掙扎，佢應該係貪玩跌咗落水浸親。
我正想諗辦法救佢，嗰一刻，我突然諗起，小虎問我，佢爺爺都死咗，點解我仲未死。
係唔係每個老人，都要為後生仔而犧牲？
我眼睜睜睇住小虎嘅掙扎愈嚟愈無力，直至靜止，沉落水底。
我喺河邊坐咗好耐，小虎嘅屋企人嚟搵佢，好擔心咁問我，小虎係邊。
「浸死咗啦。」我淡淡然咁講。
冇幾耐，好多村民趕過嚟，譴責我唔救小虎，甚至唔幫佢求救。
我微笑住講：「小虎係自殺嘅，佢話佢年紀細，冇乜勞動力，要將糧食留畀大人。我梗係要尊重佢偉大嘅犧牲。」
村民一時之間，都畀唔出回應。
我繼續講：「為咗紀念小虎嘅犧牲，既然我哋已經有『老人山』，不如呢條河就叫『小朋友河』啦。」
犧牲好偉大，犧牲小我嘅人值得讚揚。
但所有犧牲都應該係自願，從來冇人有資格，要求另一個人去犧牲。
—完—
新書《真實虛擬一鏡過》已經出版了，現正發售中，
詳情可點擊這裡：https://bit.ly/3eTPuHL
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #所有人都叫我去死
