每當遇到不知所以（謂）的人，爸爸總說：
「長風萬里送秋雁。」
他從不長篇大論解說，讓小腦袋去參透，
背後的道理，這篇大概傳譯一二。
《 #祖嘉爸爸的內斂智慧》
《大隻佬》中的因果論
—
因為你努力健身，所以變咗做大隻佬。努力健身係因，大隻係果，係一定嘅。而劉德華睇到嘅可能係你點解會努力健身，而點解努力健身嘅背後又會有更深層嘅原因，一直推番去前面，是因也是果，你嘅行動又會影響到其他人，一層一層咁幅射到去成個世界，「如是因，如是果」。
—
大隻佬因為睇到因果，知道一切都係命中注定，所有嘢都係宿命，一切都無挽回，所以還俗，喺三十歲至三十五歲嘅時間，做盡一切犯法嘅事：跳艷舞、非法入境、偷嘢等等等等。如果人生嘅路係注定嘅，而亦一定會終結，點解仲要堅持做好事呢？
—
然後，劉德華遇到張栢芝，佢睇到一個有關日本軍人屠殺嘅「因」，所以知道李鳳儀一定會慘死，呢個就係「果」。有人問個日本軍人究竟同張栢芝有咩關係，電影嘅意思大抵都係指向個日本佬係張栢芝嘅前世，前世嘅孽，今世就要還，好似當初劉德華決定還俗講嘅嘢一樣，「因果」係好公道嘅。
—
但兩個人喺大排檔食嘢嘅時候，劉德華又話栢芝唔係個日本兵，但如果佢唔係，點解張栢芝又要死？劉德華同張栢芝都看透因果，一個選擇放棄自己，唔再做和尚，聲色犬馬；一個選擇喺未知嘅死亡來臨之前盡力去貢獻世界，甚至栢芝最後去追尋孫果，其實都係應允緊自己嘅諾言，佢明知自己會死，所以佢決定用自己條命嚟引個兇手出嚟。
—
沉溺不悔對比樂天知命，惡念會承傳，例如開場嘅印度佬慘死，下世又會唔會佢變成報仇嘅果個人？被出賣、復仇，殺與被殺，全部兩位一體，糾纏不休，然後構成咗世界。你比人打完之後，再去打番人，好正常，亦係「因果」，但一切又有無改變嘅可能呢？
—
張栢芝被斬頭，了因搵到孫果，但劉德華無再選擇「以暴易暴」，因為喺「因果」之中，仲蘊含咗人嘅個人意志同選擇，你可以選擇寬恕，你可以選擇原諒，打破惡嘅蝴蝶效應，開創善性嘅循環，係可能撼動到全世界。
—
所以，張栢芝嘅前世唔一定要係日本軍人，佢嘅遭遇只係連鎖效應嘅一個小部份，正如你比老闆鬧可能唔係因為你做嘢做得差，而係老闆尋日同老婆鬧交，但你從未認識佢太太。公唔公道？係唔公道，正如人永遠控制唔到自己嘅出身同過去，但你仍然可以選擇呢一秒鐘你會做啲咩，宿命之中仍然有變嘅可能，惡念令無辜嘅人受罪，但正念可以逆轉世界。
—
《大隻佬》，意義非凡。
—
（套戲細個睇唔明無咩印象，尋晚先認真睇多次）
