Nj：個人感覺《#義勇群英：#蛇眼復仇戰》宣傳無乜，氣勢無乜，上咗都無乜人知咁款。十年前兩集G.I.Joe嗰時偏劣評，無睇過，更加無對新呢套reboot/前傳/外傳有啲咩期望。咁可能係好事，出到嚟整體感覺又唔係好差，叫做有啲野睇下，正正常常劇情有啲官能刺激咁我其實都收貨。
.
話佢擁有自己靈魂就一定唔係，揸住個版權去拍但又唔覺得佢為個世界同正邪兩派定下啲咩特別野。如果套戲唔喺日本拍，應該會出晒事。日本公路、街頭搭景、日式庭園、城堡周圍成為戰場，唔係新鮮但都有足夠睇頭，文武戲交替節奏都合我自己要求。男主角Henry Golding儘管見佢已好努力，不過真係做唔到打仔武士嗰種快狠準，亦覺得佢未夠班做主角。第二男主角雷影反而仲型，好唔好過上代李炳憲好難講，但就一定吸引過主角蛇眼。
.
睇嗰時，係會不停諗起早排上嘅《真人快打》。夠B級、夠中二，但《蛇眼》劇情順過《真》好多，起碼無睇到我燥。但《真》又打得勁過《蛇眼》好多，齋睇真田廣之打絕對零度已痴晒線咁型，《蛇眼》打戲太搖太碎，演員練得幾努力都未能完整清晰睇晒。後期加入紅髮女、男爵夫人想好把炮咁曬冷，簡直失敗失控想笑。仲有“試煉”係咁講懶係好玄嘅道理，某啲人物不明所以突變立場，都令人感覺未夠力扮大片。套戲就好壞參半，以創造世界觀嚟講唔多成功，不過一般戲去睇唔算好難睇，都有足夠打戲chok下pose、格下劍，都OK喇。你問我嘅話，覺得其實好睇過近排嘅女英雄片…（又準備俾人打）
同場加映：
★加入狂友fb群組【 #狂氏電影綜合症候群 】
★*// http://bit.ly/32xJWLp //
★直接交流 × 傾講電影有你帶頭！
