因為前女友，我變成超級電腦（上）
人總係渴望得到一啲自己冇嘅嘢。
我渴望嘅，係感情。
我叫阿漠，係一個孤兒。
我自細就喺孤兒院長大，後來都考咗入大學，成績冇比其他人差。
但係，每次同學話要返屋企食飯、投訴阿媽好煩嗰陣，我心裡都有難以壓抑嘅羨慕。
我有朋友，有關心我嘅老師，但佢哋都唔係親人。
直到我遇到曼曼，佢對眼好似有星星一樣，望住我嘅時候會閃閃發光。
佢話，佢要做我女朋友。
「曼曼，我咩都冇。」我手足無措，唔好話富二代，就算一般中產家庭，必要時都可以拎幾十萬出嚟畀個仔結婚。
曼曼捉住我隻手，眼神堅定：「我咩都唔要，剩係要你。」
喺灼熱嘅愛情下，所有問題都唔再係問題。
「我畢業後，人工唔係好高，冇辦法畀你鮑參翅肚。」「冇鮑魚飯，咪食燒味飯囉。」
「我三十歲前儲唔到首期。」「買唔到樓，咪租樓住囉。」
就係咁，曼曼做咗我嘅女朋友。
我哋打打鬧鬧，無憂無慮，幾乎每日都一齊。
我哋去晒每一個地方，只要唔洗錢嗰啲，都有我哋嘅足跡。
我以為，曼曼就係我嘅親人，我哋會一齊建立家庭，一齊過平凡而幸福嘅生活。
但大學畢業後，曼曼變咗。
或者係因為，佢啲女同事都有富家男朋友，個個星期都可以喺五星級酒店High Tea打卡。
或者係因為，老闆個仔Flirt咗佢幾句，令佢以為自己有機會嫁入豪門。
或者……佢就係變咗。
曼曼開始要求我買好貴嘅禮物，要同我去高級餐廳。
我個個月捱面包，都滿足唔到佢嘅要求。
曼曼叫我上進啲，為我哋嘅將來而努力，我都努力開OT，努力進修。
但一個月入一萬五嘅IT仔，上進啲，搏晒命，可以搵到幾多錢？
二萬？二萬五？無論幾多，都唔足以滿足曼曼嘅物欲。
然後，曼曼同我提出分手。
嗰個對眼曾經閃閃發光嘅女仔，呢一刻，佢眼神輕蔑咁望住我：「I deserve better.」
曼曼唔明白，呢場唔係一場普通嘅分手，佢係我唯一嘅親人，佢係我全心全意嘅信仰。
呢一切，瞬間崩塌。
或者佢咩都明白，但佢已經唔在乎。
我努力忘記曼曼，但我每分每秒都諗起佢，陽光月亮雨水都係佢。
既然冇辦法忘記，熾熱嘅愛就只可以變成仇恨，我想令曼曼後悔。
我想住豪宅，揸靚車，成為曼曼眼中高貴嘅金龜婿，想佢跪喺我面前，承認自己當日分手係幾咁不智。
直到有一日，老闆問我：「呢排開咁多OT，好等錢洗啊？」
我講出我嘅遭遇，老闆嘆氣：「但你開幾多OT，都唔會達到你嘅目標㗎。」
我沉默，現實唔係小說，唔係你發奮就會變成超人。
我點樣努力都好，始終係一個搵萬幾兩萬嘅IT仔。
哪怕我搵到四、五萬，都唔足以令曼曼悔不當初，痛哭流涕。
老闆神神秘秘咁講：「我有一個發達嘅機會，但需要犧牲。」
老闆話，佢係一個神秘科技組織嘅成員，組織研發咗一個新技術，可以將人體同超級電腦結合，成為人型超級電腦。
超級電腦可以做好多精密計算，但始終係電腦，冇人類咁人性化。
如果可以結合兩者嘅優點，無論科技研發定買股票，都無往而不利。
我呆咗：「我係做IT，但我唔係諗住咁樣做……電腦喎，會有咩副作用㗎？」
「如果剩係得優點，就唔輪到你啦。」老闆都好坦白：「人體結合電腦後，會漸漸喪失一部份人類嘅欲望同感情。」
「咁咋？」我冷笑一聲。
我無父無母，連曼曼都離我而去，感情帶畀我嘅只有痛苦同寂寞。
我唯一嘅欲望，就係報復曼曼。
下集：https://bit.ly/2W9tDWN
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #因為前女友我變成超級電腦
大學投訴老師 在 我要去跟教育部投訴- 課程板 - Dcard 的推薦與評價
我覺得我浪費了好多時間，在上一個根本沒有在上正課的老師身上，直接投訴到教育部應該不會公開我的名字吧！ ... <看更多>