《玩「你到底有多了解」考驗，差啲玩到悲劇收場》
自從Hide all哂班成日洗版邀請人玩遊戲嘅麻煩朋友之後，我嘅facebook可以話係清新返好多。但好景不常，呢幾日突然又興起乜鬼考驗叫做「你到底有多了解…」，瞬間瘋傳佔據成個facebook版面。
雖然已經盡量hide走佢地，但無奈有個點都無得避，因為連我女友都有份玩埋一份。
而作為一個稱職嘅男友，即使佢無tag我，都識得自動自覺九秒九撳入去玩，仲答出一個15/15嘅完美成績。
我會咁厲害並唔係因為我真係好了解女友，而係個考驗本身有bug。答錯只要上一頁就可以重新選擇個啱嘅答案，所以根本就無難度。
自豪咁影張15分嘅相send俾女友睇之後。本以為夜晚見面嗰陣一定可以得到「獎賞」。點會估到，竟然係惡夢嘅開始…
「喂喂，呢個考驗呢幾日好興呀，你試下玩囉。」
一入到餐廳搵到位坐低，女友就即刻遞佢部手機過嚟叫我玩。
「吓？我咪玩過囉，仲send咗張全中相俾妳睇！」
「嘻嘻，你玩下先啦。」
見女友笑笑口，我已經心知不妙，成件事一定有陰謀。雖然係咁，去到呢步想避都無得避，只能夠頂硬上。
撳入測試，簡單打個名之後，第一條顯示嘅問題──同之前一樣都係【一定要選擇一個的話你女友會選擇親情，愛情還是友情？】
我仍然有印象，之前嘅答案係「愛情」。所以我諗都無諗就撳上去……結果錯咗，答案居然係「親情」。
「明明頭先答係愛情架！？」我難以置信咁問女友。
「嘻嘻，頭先又點可以同而家相題並論呢？頭先個公開版本，純粹係俾啲唔係咁熟我嘅人瞭解下表面嘅我。而你呢個版本就唔同啦，只係得你有得玩，毫無保留咁知道真正嘅我係點諗……簡單啲講，即係本我、自我同超我係有分別咁…」
完全聽到一舊雲，果然當初唔應支持佢副修心理學！
「咁都解釋唔到點解係親情架！？」
「傻瓜！」女友扑一扑我個頭，「將來同你結埋婚生埋仔，最重要當然係親情架啦！」
「吓…？」無法反駁。
因為佢咁講又唔係無道理。所以，我只能無奈咁撳入第二題──【如果生命只剩下最後一天你女友會比較想跟誰過？】
雖然答案有好多，但講到尾都不外乎係「家人」同「戀人」之間作出抉擇，其他嗰啲特別係「Leonardo Dicaprio」根本就無可能！
既然頭先話係「親情」重要，咁一於選擇「家人」啦！
…又錯咗。
「點解會係里安納度架！？」我無法理解。
「你咁都唔明架！？」女友一臉難以置信，「如果今日係最後一日，我當然要同佢過，仲要同佢講，話俾佢知就算今屆拎唔到奧斯卡，佢都會係我最鍾意嘅演員…」
「唔係嘛…」
「你真係無鬼用架！咁簡單都錯！」
可惡。為咗力挽狂瀾，我知道第三條一定唔可以再錯──【你女友要愛情還是麵包？】
雖然之前答過係「愛情」，但受過上兩題嘅教訓，今次我學精咗啦，唔可以用正常方向去理解女友，一定係「麵包」！
…又錯咗。
「你係咪特登答錯架！？」女友大罵，「我唔鍾意食麵包你知架！？」
「但…頭先兩題…唉屌…」
嗚嗚，點解一次簡單嘅考驗都要玩到好似心理遊戲咁？
雖然之後十條總算啱返六條，但女友嘅心情仍然無好轉到…
「我同你講呀，如果你啱唔到一半！我地就分手啦！」
「唔係咁玩嘛！？」
而家情況係十三中六，要答啱一半嘅話，即係最後兩條都唔可以錯。
好難…實在太難啦。
越諗越驚，我望住螢幕，第十四條係──【目前為止你女友交往過的人數是？】
慘了，呢條唔單止上次無出現過，女友亦都無喺我面前講過自己拍過幾多次拖。呢啲唔係禁忌嚟架咩？點解會出現呢條問題架？
換句話說，呢條問題只可以估，最有可能當然係「1」或者「2-5」，究竟係邊個呢…
「答啦！手機就無電啦！」女友喺旁邊催促。
呢刻，我就好似一個柏金遜症病人一樣，手越震越厲害，就算撳錯都唔會出奇。然而，就喺回答嘅最後一刻，我突然瞄到一個數字……一個充滿希望嘅數字。
「就決定係你啦！」孤注一擲嘅我，最後選擇個答案係「6-10」
中咗。
「點解…你會知我拍咗6次拖架…？」女友非常意外。
「哈，哈哈…」我滿意咁笑咗笑，「呢期就係興6號，答6一定無錯架啦！記住呀，2月28日新界東補選記住投票，我支持6號！」
「唓懶叻！仲有最後一條呀！」女友指向部手機到。
望返去螢幕，最後一條，竟然係【哪一個是你女友現在的感情狀態？】
呢刻，我終於忍唔住露出勝利者嘅微笑。雖然有成七個選擇，但我同女友拍緊拖係一個不爭嘅事實，所以答案一定係「穩定交往中」！
「哈哈哈哈！！！」我彈起身瘋狂大笑起嚟，嚇到本來諗住坐埋嚟嘅一對小情侶即刻彈開，「機會嚟喇飛雲！」
我自信滿滿咁撳落「穩定交往中」到，而結果…
…答案竟然係「Was with someone, but broke up」（曾經一齊但散咗）
「點…點解會咁架！？無可能！？無可能架！！」
就好似喺天堂瞬間跌落地獄咁，我難以置信咁將目光移返去女友身上…
呢刻，佢竟然露出一個夜神月「計劃通」嘅表情…
「你啱唔到一半…」佢一邊講，終於忍唔住奸笑起嚟，「哈…哈哈…」
「係陷阱！妳係故意咁做，妳有心…有心…」
…分手？
「無錯，我地分手啦。」
無辦法接受呢個事實嘅我開始頭暈起嚟，一個天旋地轉跌落地下。眼前一黑，暈咗。
*
一醒返，我發現自己訓咗喺張病床上面。旁邊仲坐咗一個人…我女友。
「你醒啦！？」女友一見到我醒好激動，仲忍唔住喊起上嚟。
「點解…妳唔係話同我分手咩…？」我大感困惑。
「分咩手呀？你係唔係發惡夢？」女友反問，抹一抹雙眼嘅淚水，「你放心啦，我已經撳咗掣，醫生好快嚟到…」
原來，係夢，好彩咋…
「嗚嗚…」一諗到呢到放鬆落嚟，連我都忍唔住流出男兒淚。
「唔好喊啦…係啦！你知唔知呀，你暈咗呢段時間有個測試上網好流行架！叫做『你到底有多了解』…」
「嘩呀！！！救命呀！！！我唔想再玩啦！！！妳放過我啦！！！」
呢啲考驗，有時真係玩死人架。
（完）
＝＝＝＝＝＝＝＝＝＝＝＝＝＝＝＝＝＝＝＝＝
FB： 有心無默
個人ac：（歡迎 follow）
https://www.facebook.com/myechoofheart
IG：
https://instagram.com/echoofheart/
夜神雲手機 在 pc 端使用雲手機：如何在夜神模擬器上運行紅手指雲手機？ 的推薦與評價
... <看更多>