金融講ED: 渾水
海航走資的變奏
海航集團係呢兩年做併購做得最活躍的企業，比起一般國企、央企更活躍。一般市民未必在意，可能直到海航74億元天價投地才會留意到海航的存在，因為住係同生活相關。雖然係咁，海航都只係話：「香港係一個個小小的投資」。英國耆衛保險公司(Old Mutual)、德銀、嘉能可(805)等國際企業全部跟海航都有併購往來，海航所言，的確非虛。
股民可能會在意多一點海航，因為海航係香港其中一路買殼的主要大陸水，最近收歸旗下的有KTL(442)、嘉耀控股(1626)和龍傑智能卡(2086)，過去已買入的香港國際建投(687)、海航實業(521)及航基股份(357)。過往有其他媒體講過海航整個大戰略部署，不過今次就借用一下香港國際建投，講一講當中的巧妙操作。
海航投地，終歸都係要找數，但內地的資金搬落來香港不是易事，因為有外匯管制，以往一直沿用的內保外貸都慢慢失效，開始被杜絕。今次海航的找數方式，不是用內保外貸，而是借用上市公司的集資平台，巧妙地把內保外貸這條「橋」改一改，始終買了咁多殼，終於都發揮用途。
海航買地用的vehicle係香港國際建投，因為海航買親的殼都比較細市值，要消化啟德投地條74.4億元數唔容易，不容易過到港交所(388)。香港國際建投相對較大隻，而且全購買殼過了2年，避了「反收購」當中的「明確測試」，不是新鮮買落的殼，可以即刻用來做嘢。
為了順道谷大市值同籌錢，香港國際建投以溢價供股價「一供二」，集資92億元，最大的部分還是要由海航子公司HNA Finance和建銀國際承擔。概念上去講，一般的內保外貸是把公司的內地資產抵押給內銀，是為「內保」；再透過內銀在香港的分公司去把扣除成本的等價現金套出來，就是「外貸」。這一招，就是為了把資金套出來，因為內地主旋律係打壓走資，「內保」這部分當然無問題，但如果「外貸」是用來買香港啟德塊地，香港by內地的definition係「境外投資」，錢直接流向境外，就是走資了，程序上過不了。批貸款係屬於credit部門的工作，佢哋知道底蘊，不易解釋。
然而，有一隻殼就唔同，因為今次「外貸」的vehicle不是直接用來買啟德塊地，而是用來包銷「自己」旗下公司的供股股票，理論上錢是用來買「自己」的資產，所以程序上是相對容易通過。當然use of proceeds都要寫得巧妙點，聰明點，這就是iBanker的價值之處，也就是做一個good sales必備，理論上唔難。同時集資只需74億元，今次刻意集多一點集夠92億元，都是為了隱藏目的。術業有專攻，做多少少工序，搞多點財技花樣，都係為了找藉口說服credit部門套錢找數。
建銀的角色係舉足輕重，因為要做內保外貸，一定要內地、香港都有分公司，內銀就有這個得天獨厚優勢。而且，海航是背負住國家走出外，攻城掠地的任務，自然要用留番國家的御用銀行去幫手。順帶一提，建銀做投行刁的實力幾強，好像幾星期前大爆的輝山(6863)，很多內銀都中伏，有壞帳要撇，但建設銀行(939)係少有其中一間預先收回額度，大步檻過的內銀，真有先見之明的說。
https://www.am730.com.hk/…/%E6%B5%B7%E8%88%AA%E8%B5%B0%E8%B…
