身邊總有一兩個朋友近期會同你講：
FRIENDS REUNION呀！
一套做咗十年十季236集嘅電視劇，
總有一個忠粉在左近唔出奇吖。
我唔係粉絲，
但有一段時間，
我隔離嗰個晚晚番去就係播FRIENDS，
loop到最後一集又由頭睇，
嗰一刻我發現 “FRIENDS" are really friends!
現實中嘅朋友咪就係可以loop嚟loop去
都係嗰一班之餘，
仲重複又重複做番嗰啲野，
講番同一堆是非，
回味番從前搞過嘅老土gag，
呀，仲有少不免有啲情情塔塔野喺朋友堆入面發生。
我覺得 “FRIENDS”呢套電視劇有一個設定係好吸引，
特別係對於當時嘅𡃁仔簡直係一個夢想，
就係6個好朋友一齊住！
Friend喎，一齊住喎，
可以無王管，
日日夜夜幾時見都得喎。
同friend一齊住點解係一個咁大嘅fancy？
首先，
細路仔同邊個住邊有得自己揀嘅啫，
可以離開屋企，
自己揀同邊個住係一種成長嘅自主，
係父母默許你有話事嘅權利，
兼承認同放手俾你擁有自由，
係成為「大人」嘅一大指標。
第二，曾幾何時，
我地對朋友嘅定義就係全天候24小時on call，
最好可以咩都一齊，
一齊打通宵機，
一齊半夜飲酒吹水，
唱完K可以夾錢搭的士番屋企，
有咩事可以第一時間同朋友講，
一失戀就對住對方喊⋯⋯
總知有幾FRIEND就有幾痴，
痴身個痴。
呢種對友誼嘅痴迷完全可以由 “FRIENDS”
呢套電視劇投射。
細個覺得友誼就係”FRIENDS”咁囉，
人大咗，
對於真正嘅友誼，
反而覺得貼近出自《莊子·山木》嘅一句：
「君子之交淡如水。」
貼得近，未必就好。
當大家生活開始各自忙碌地承擔著柴米油鹽，
平淡一點，互不苟索，
都係對朋友嘅一種溫柔善待。
只要對方知道有咩事，
你仍然會義無反顧，兩脅插刀，
咁就夠喇。
第三，亦係最緊要嘅一樣，
“FRIENDS”入面啲人好少講做家務，交租，買餸，OT呢啲話題，
就算RACHEL入屋埋堆聽啲friend講嚟個成人禮，
剪哂老豆啲附屬卡。
之後佢只係做一個WAITRESS又養活到，可以夾到租。（仲要係租間咁靚市中心嘅屋。）
Phoebe ，Joey佢地一日到黑彈吓歌，
去吓CASTING又生活到，
總知最緊要每日落去Perk嘆杯COFFEE，
圍爐取暖又一日。
烏托邦式同居生活令天真嘅我們
曾經信奉“FRIENDS”嘅美好。
成為真正嘅大人，
經歷過大大小小嘅生活折騰後再睇番，
呢班好似唔駛點做又可以一齊住嘅“FRIENDS”
其實只係咁多年嚟放喺心中嘅“imaginary friends”。
係囉，放喺心咪好地地囉，reunion唔好啦。
#三五成群 #圍爐散文集 #friends #friendsreunion #reunion #圖片出自公司friends忠粉 #屋企有人嗰盒無拆過 #美好回憶在心中
