【龔成問答信箱】（Q18241-Q18260）
Q18241：
龔成老師你好，我都係80後，剛33歳，一名普通專業人士，其實對自己份工唔係超大passion,一直都想財務自由。
我同男友夾份都買咗一層在奧運站的樓（比市價買平一成），打算結婚後自住，每月都要還唔少錢。現只餘下60萬cash。
想賺多些錢，但自己又係文科出生，對股票一點也不懂（因為覺得有好多數字），想諗下做生意，但business sense 又唔係太強。
我知道你好成功，所以想請教同輩你，希望可以指點一下我。thank you so much for your kind advice!
龔成老師：
如果無興趣、時間、能力做生意，最好就是進行投資，善用你手上的資金。
你要增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。
理財是一個資金分配的問題，在你可承受風險的情況下，爭取適當的回報。
你可以利用月供或分注的模式，進行投資，但一定要同時留有現金，唔好用盡。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。
你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
------------------------------------------------
Q18242：
老師你好，想問個問題。其實屋企人都快將係10年後，現時有30萬既資金，因為我讀會計既，對股票會比較敏感小小。
我睇你80後百萬富翁有講過呢，有人借左30萬，創造左30萬既回報後再還番30萬比人。
所以借唔係一個問題，如果我用30萬幫屋企人投資，你建唔建議咁做呢?
另外都有親戚都想比錢我幫佢地投資，但係我冇咩管錢既經驗，你認為點開始會比較好呢?
龔成老師：
如果你未有足夠的投資知識、經驗，建議你唔好幫手投資。
因為投資總有機會有虧損，你到時會面對好大壓力，因此如果你本身知識不強，就唔好做。
你可以建議佢地買一些ETF，如盈富（2800）以及收息股，例如建立一個收息股的組合，目標是5%、6%的股息率的收息股，例如港燈（2638）、香港電訊（6823）、工行（1398）、恆生（0011）、置富（0778）、陽光（0435）都可以。
------------------------------------------------
Q18243：
1810&9988可以在什麼價位沽出？
請問港交所現價可入嗎？
龔成老師：
上述兩股都是有質素，有增長力的企業，唔好輕易賣出，你唔好太心急想「賺左先」，長線持有往往了更好的回報。
如果你較多貨，就可以在佢升多1、2成，賣部分。但點都建議有一定的貨在手。
至於港交所（0388），優質股，可長線，去翻$300較合理，起碼都$330較穩陣。
------------------------------------------------
Q18244：
老師 你對將來Ai人工智能前景有咩睇法，如果發展AI智能股票有邊隻可以推介下？
你覺得這些股票值得投資嗎？
我還想問 1211，7X左右，在合理水平嗎？
同埋2382，在合理水平嗎 ？美國對華為的事件對佢影響長遠發展，影響大嗎？值得買入嗎
龔成老師：
Ai人工智能前景正面，相關的應用只會更加廣泛，擁有較多數據的企業，就可以延伸發展得更強，因此，阿里（9988）、騰訊（0700）都是這類，平安好醫生（1833）都有利用人工智能原理運作。這些都是有長線投資價值的股票，但就要留意平貴情況。
至於比亞迪（1211）$7X已經是合理區的頂位。
而舜宇光學（2382），現價在合理區中上部，可以分注投資，這股都有長線持有的價值。華為會對佢中短期影響，但長遠未必影響好大。
------------------------------------------------
Q18245：
老師想請教一下
我依家持股比例係
0003 468股 （月供$1000）
0005 158股（月股，已停）
0788 2000股 （一手買）
0823 598股 （298股係月供股，現在每月供$500）
1177 106股 （月供$1000）
2800 114股 （月供$2000）
我依家keep住月供$4500，但發覺823既比例好似太多，差唔多68%，阿sir你覺得我應唔應該繼續供佢？如果唔供佢既話，如果小米同比亞迪，邊一隻會比較適合呢？
我28歲，月供股票$4500，（可加到5千）每月自己儲到2-3千現金，另有5千同另一半一齊儲，（每月共一萬，未必會用黎投資，現時有8萬）5年滾存到$100萬有可能嗎？
龔成老師：
你持有的股票，基本上都是有質素的，可以持有，但之後的入貨就要睇翻佢的質素，以及你持貨的比例。
如果領展（0823）太多，就要停止買入，慢慢增加其他股票就得，你可以將資金投資盈富（2800）或比亞迪（1211）。
你的方向正確，但你要加大儲蓄，先有機會做到5年$100萬。
同時，你要持有一定的現金，等機會。現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，選到有潛力的股票，到大跌市時就能把握機會，財富增值會更明顯。
------------------------------------------------
Q18246：
龔sir 我另外大概有一萬蚊嘅本 想作短炒 但係我對短炒真係無咩頭緒
而家放緊no pay leave 人工真係好低...
仲好努力搵緊工
但原本目標係一年後可以自己搬出黎住 租住屋先 所以想係短期內有高啲嘅增長
龔成老師：
短炒一定無用，我20年前都試過，炒幾年輸幾年，好後悔。
另外，根據我過往做了10年銀行與證券行的經驗，見證大量散戶投資成績，可以話你知，短炒唔會賺到錢的。
加上全球憑投資賺最多錢的人，巴菲特，佢是強烈反對短炒的，希望你跟一些「真正能賺錢的方法」。
你可以利用這段時間，好好增加投資知識，以及試下做小生意，有機會幫你開發新事業。
------------------------------------------------
Q18247：
老師，本人以前買左5萬股既煤氣，平均價大約15元，前陣子又買了金莎和盈富
而之前想在40元以下買入比亞迪但卻步了，家下有點兒後悔當初的感覺。
而近日聽到同事短炒賺左十萬八萬，感覺自己投資的進度有點落後，因問時間就是金錢，請問該如何調整，調整投資方向還是怎樣的
龔成老師：
其實我地最重要，是建立一個平衡的組合，你上述所講的股票，都是有質素的，不過就唔需平衡，缺乏一些較有增長力的股票。
至於短炒，以我過往做了多年銀行與證券行的經驗，短炒者的結果都只會是輸錢的，這點我可以絕對地講，只是時間問題，因為我見得太多了。
你要從長遠角度，建立平衡、優質的組合，這個方向去想，同時在現金中取平衡。
------------------------------------------------
Q18248：
請問以現時香港局勢，買股好？定買樓收租好？
龔成老師：
如果從投資角度，這刻的股市比樓市較有投資價值。股票這刻未算貴，加上較靈活，值博率存在。
但如果你自住，那樓市不是不能考慮，中短期的樓市，受多種因素影響，樓市升跌較難預測，至於長遠樓價，仍會偏向上，而分析的重點有兩大因素。
第一，現金不斷貶值，這在過往數十年不斷出現，結果好明顯，同時，現時正不斷進行，相信不難預測之後情況。
第二，供求，香港長期的土地供應不足，這情況仍未解決，因此往後仍會供不應求。
所以，如果有自住需要，若果香港經濟轉差令樓價下跌，就可以考慮入市。
------------------------------------------------
Q18249：
老師你好 我幾個月前開始月供股票 3000煤氣 3000港鐵 4000銀娛 如果我維持每月10000total 你覺得我而家呢個組合好啲 定我可以加多隻例如中生？
龔成老師：
由於你組合增長力不強，如果想平衡翻D，你可以加多隻中生（1177），你可以減煤氣（0003）金額至$2000，另外兩隻各減$500，中生就供$2000。
------------------------------------------------
Q18250：
你好老師，最近賣走了自住的樓，手頭上有4,000,000現金應該怎樣部署
不過要穩陣只可以用作收息，能否對消返每月兩萬蚊的租金？又麻煩老師了
龔成老師：
要睇你的風險承受程度，如果你較保守，就可以投資收息類資產，如果你可以承受風險，可以投資「收息股」+「平穩增長股」。
平穩增長股：盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
同時，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、置富（0778）、陽光（0435）都可以。
另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，可以留一半現金。
餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q18251：
老師 想問下點樣去評定一隻股票的平貴？ 有時覺得貴但佢都仲可以繼續升？
龔成老師：
留意，平貴只是計算「企業合理價多少錢」，不是估頂，貴完可再貴。同埋企業價值可以增加的。
要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。
簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。
如果要深入計算，基本上要好仔細的研究企業，要分析好多財務數據用比率，先至有較完整的答案。
------------------------------------------------
Q18252：
老師你好！好多謝你年半前嘅提點。最後我將組合平衡過，加入左類似盈富基金嘅平衡組合股票，同埋幾隻優質股，到咗今日已經追番大約一半嘅損失啦！上次嘅教訓成為左進步嘅經驗。
有一個操作上問題想請教，就以賭業股為例，而家我持有金沙，但係研究過老師你嘅分析之後都贊成銀娛長遠潛力比較好。
面對這些企業品質沒有變，平貴差不多，但同業潛力比較高的情況，我們應該繼續持有還是將部份金沙轉為銀娛呢？
知道老師你都有透露過你自己持有金沙，所以特地選用這個例子來想向你學習
另外一個問題就係，我自己而家係係儲現金狀態，作為日常開支應急。在投資資金上大概有六成已經投入市場，其餘四成在等待有大波動才入市。
我見老師會教我哋用月供股票去平均成本，但是在我的個案因為沒有新資金加入，如果我月供股票
就會把餘下四成的資金慢慢用完，都有大跌市時我就不能捕捉時機，但是如果不月供，萬一牛市又會損失增值機會，我應該樣做呢
再一次謝謝老師教導
龔成老師：
金沙（1928）與銀娛（0027）都是有質素的股票，都可以長線投資，金沙收息方面較好，銀娛增長力較強，投資那一隻，其中一個因素就是「是否適合自己」。
如果你想組合增長力強D，就可以將部分或全部金沙轉到銀娛。
我地投資，就是建立一個長遠的財富組合，這是一個配置的過程，你要建立適合你的比例分配。
如果你無收入，只是用現時的資金投資，就要設定一個界線，例如當你的現金去到得翻2成，就要停止月供，等你有一定的應急錢及等跌市的資金。
------------------------------------------------
Q18253：
Hello 龔成, 多謝你成日好有心機地回答讀者的問題, 我近排都買左你本 <<大富翁致富藍圖>> 開始跟你學投資理財。
我嘅背景 - 32歲, 已婚, 同老公家庭月入$69k, 每個月可儲 / 投資$15k, 有自住物業岩岩先開始供, 另有30 萬股票:
788 - 中國鐵塔 24000股
1299 - 友邦保險 200股
2628 - 中國人壽 2000股
9988 - 阿里巴巴 200股
1 - 長和 500股
823 領展房產基金 700股
2800 盈富基金 500股
388 港交所 100股
861 神州控股 4000股
3309 希瑪眼科 2000股
939 建設銀行 1000股
3 香港中華煤氣 1000股
我主要有兩個目標:
1) 想係3 年內有120萬
a. 請問我依家的股票組合會唔會太散? 可以怎樣更好選擇?
b. 投資係潛力股 同 收息股的比例應該係點?
c. 當我有120萬後，我應該把錢投資在樓市收租, 還是繼續投資在股票上?
2) 想係10 年內達到財務自由，每月有$40k現金流，現在仍未有頭緒應該點樣才可達成，請問應該係咩階段要把股票轉為收息股? 收息股又需要點分配才可減少風險?
龔成老師：
1）A）組合唔算散的，大約10隻股票是適合的。而當中持有的，基本上都是有質素的股票，大致無乜問題。
B）如果你的目標是想有$120萬，你應該投資翻一些較有增長力的股票，而收息股則未必適合你投資。
你可以集中投資平穩增長股（7成），小部分為潛力股，如果你投資實力提高，潛力股比例都可提高。
C）如果你未有物業，應該在配置上，買物業先。可以令你的財富組合更平衡，《財務自由行》會有更具體教你股樓平衡的方法。
2）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
你可以去到財富已有一定數目，例如10年後，要重組資產，已經能夠成功財務自由。
------------------------------------------------
Q18254：
龔sir，我是澳門人，之前買了《財務自由行》發覺原來我自己有好多對金錢的concept錯誤，上星期買了《80後百萬富翁》已經好快看完。我下個月就36歲，如果我26歲時能夠看你的書，有關注到你就好了！
我要決心40歲一定要儲到至少100萬，以我的人工，真的不難。
我和先生月入差不多九萬，每年有現金分享又有退稅，但澳門人真的只是外表風光，現在我們每月開支很大，供樓、供車、比家用、請工人、小朋友儲蓄險、醫療保險等等，因為開支大，我和先生是ＡＡ主要開支。
現時，我每個月用小朋友名義儲6千（是2.5% 零存整付，所以短期不能動用只可以儲），我自己只能儲1-2千。之前有月供823和2800，但中間有斷過。現時只有手持市值約$4萬股票。
我和先生最大問題是每次儲到一筆錢，就會需要用到，例如最近因為有需要就付了十萬首期開始供一部新車（5年），我們的弱點是沒有足夠的現金流。
看完你的書，我決定改變自己不要一有錢就用（例如買手袋）。你的書真的很有用，我一向不會看理財書，到現在才發覺自己在過往十年最能拼博的年紀錯過了很多！
澳門月供股票手續費好貴, 每供一隻每個月就收取$50, 例如我供823和2800每個月就收$100 (不管多少金額), 其實我想9月開始月供285作長期持有
但手續費又多 $50, 你建議是先儲錢直接入一手還是可以overlook手續費的問題?
龔成老師：
你們的消費模式，正正是典型中產模式，《財務自由行》所講的「死胡同」狀態。
所以，你要改變消費模式，唔好一儲到錢後就立刻消費，唔好買太多要持續負現金流的物品（例如車，買左後會持續每月支出）。
要有目標建立資產，特別是你地仍年輕的時候。
我希望你地最少能每月投資$10000，長期進行。
由於澳門月供較貴，建議你地只供一隻盈富（2800）$5000，餘下的資金，就等機會先用一手手模式入市。
你這個年齡，仍是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。
比亞迪電子（0285）雖然是潛力股，但現價唔平，因此等回先買較好，或只小注投資。
同時，你可以投資其他優質股，建立一個平衡的組合好重要。
------------------------------------------------
Q18255：
龔sir, 我今日開始自己做月供盈富,我每个月会趁佢跌幾百點就買。咁样会適合我性格多些,我要平平穩穩,财富增值之餘,又可享受下人生,因年纪也不少。
所以很欣賞你,因為你是80後,思想很成熟,由出来做野開始就不斷思考,不断改進,成為现在頗有成功的你。
今年4月開始,我便開始計劃财務退休大計。為免煩,曾经想一筆在保險公司買退休計劃。
後来在facebook遇到你,知道你教人儲盈富.銀行,地產類,但身边朋友和老公一路説没增長,買來做什么。所以我猶豫了4个多月。我老公喜欢短炒,常説一隻股票股价可以唔見一半甚至2/3,但我非常討厭短炒, 我不喜欢自己既時間放在看股價上。
所以今日趁跌市,自己供盈富,但另外1,2隻还唸計。你不建議我47歲供阿里爸爸是嗎?但我还有13年退休,總想加多一隻增長股。
还有多謝你的付出,由於我还未懂計算合理價,我已將你在facebook説的合理价做成筆記,慢慢在facebook睇你的教學片,已是一个好好学習的平台。
龔成老師：
短炒根本無法賺錢，我20年前都試過。
你用月供的模式進行，長期儲股，是最好的方法，這是最好的財富增長方法。最重要是「優質股」，建立一個平衡的組合。
如果你只有13年就退休，潛力股的比倒會較少，建議你用平穩增長股為核心，例如盈富。至於潛力股如就只佔2成好了。另外要留意，單一股票不能太過集中，你要建立平衡的組合。
你可以供盈富及阿里（9988），但最好再加其他優質股。長期進行就得。
銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q18256：
謝謝龔老師的回覆。的確，我不懂自己去分析企業的價值，之前買股票，都是看看新聞，看看股評人講解。
今年年頭開始沒有工作，多留意你的評論和買了你的書看，覺得你所説的方法很有道理。
1211，你在3月時不斷提點我們，等恆指跌到2萬4以下可以分段入市，說$40以下屬於平。好彩我都有買，不過就不多。
現時還有甚麼潛力股可投資？
另外，之前提果幾隻地產股最近都升了，是否應該等跌才入呢？
其實而家市道咁差，好多舖頭都冇商戶租，但股票好似未反映到這些？
星期六我要返學的。。其實係想問會唔會考慮開星期一至五的上午或下午班？因為而家疫情暫時冇工返，但平日晚上要照顧屋企。
龔成老師：
比亞迪（1211）我自己都在3月時的$3X增持了不少，這股有質素，有潛力，當時處平的價位，值得我地投資，長線持有的。
雖然這股升了不少，但我暫時未有賣出，希望等更好的收成，長線。
其實我早前都有講過小米（1810）有投資價值，這股在年頭出的《50優質潛力股》是新加入的潛力股，我自己在3、4月都有投資，現時仍持有，打算長線。
至於地產股，有投資價值的，我地分析時，並不是分析這一刻，而長遠，例如比亞迪與小米就是最好例子，我推介是，當時是充滿不利消息的。
至於課堂方面，要研究下。
------------------------------------------------
Q18257：
你好，想請教你，659新創建集團自去年來，股價不斷下跌，似乎比一般公用股跌幅更大，你會怎樣分析？
最近出售新巴及城巴資產，對其長遠業務發展是否有正面影響？謝謝！
龔成老師：
新創建（0659）本身不是無質素，但不是最高質之列，同時，佢持有的業務大部分不是高增長型。
疫情之下，由於佢有些業務受的影響較大，所以比起其他公用股，下跌亦較多，不過這只是中短期情況，長遠仍是有質素的，但始終增長力不強。
出售巴士業務其實是好事，因為巴士業務一向都唔太賺錢，見佢無乜加價的能力。不過在這時候賣出，作價就可能較一般。
這股整體算是不過不失。
------------------------------------------------
Q18258：
龔成老師好，我現有現金30 萬應如何理財！買哪幾衹股票好？美團好嗎？咩價合理？
龔成老師：
首先，記得增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。
另外，我地要建立一個「組合」，當中都要是優質股，要做好配置。
你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
如果想增長力高少少，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。現價唔算平，等回先入較好。
至於美團（3690），有質素，有潛力，不過現價唔算平，建議你小注投資，等跌先正式入。
------------------------------------------------
Q18259：
老師，今日經過書店見到你再版80後百萬富翁，忍唔住又買咗（已經係第三本你的著作）
自己接近40歲，現在才開始學投資，都知自己比好多人遲起步，請龔老師幫我怎樣的投資組合才最適合
本人已婚但冇小朋友，儲蓄100,000左右，人工$15000，因住家人物業，所以係冇乜經濟負擔下一路以嚟都係個個月洗剩當儲錢
自己最大的投資就是20歲個年買咗保險，人壽儲蓄$400,000，連住院危疾每月大概$2000，請問這狀況最適合投資什麼產品？
龔成老師：
有心怕遲，40歲在人生中，仍是好黃金的時期，因此只要不斷進步，仍會有不差的成績，如果我是你，我這刻會盡力學知識，努力增加財富，追翻之前的時間。
你已經有人壽儲蓄，這已經做好了防守的部分，之後就要進攻，投資股票最適合。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。
你可以做月供股票，或自行分注投資，每月$5000。
你可以考慮盈富（2800）$2000。
另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
如果想增長力高少少，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。
如果你不懂股，就集中供盈富$5000。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q18260：
Hello 龔老師，我剛剛開始留意到你個page, 非常感興趣，我27歲是自顧人士收入不穩定
疫情前收入每月約有$35000，四月起只有$15000左右，沒有債務，每月大約可有$8000存。 以前沒有儲蓄習慣，現時有6萬存款。
是投資新手，只在富圖開了戶，連買入賣出的概念都不太清楚，我希望一年後有$50萬存款，是否沒有可能？
我應該從什麼方向開始學習呢？
期待你的答覆，謝謝
龔成老師：
由於你收入不穩，加上現時的疫情情況，因此建議你點都要留到一定的現金，之後先開始投資，這會比較穩陣。
坦白講，$50萬未必得，你唔好太過急追，一步步來，先要有備用現金，然後有投資的現金，之後就可以投資，由於你本金不多，因此錢搵錢的力量未能產生，因此，你這刻要盡力儲資金先。
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。
你可以做月供股票，每月$5000，或自行分注投資。（留意，你要有你認為足夠的備用現金，先可以開始進行）。
你可以考慮盈富（2800）$2000。
另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。
如果想增長力高少少，可考慮：南方恒生科技ETF（3033）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。
如果你不懂股，就集中供盈富$5000。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
八 士業 在 【八士業護身研究会】第3回研究発表！司法書士、税理士 ... 的推薦與評價
【 八士業 護身研究会】第３回研究発表！司法書士、税理士、土地家屋調査士、社会保険労務士、行政書士、海事代理士の方々が参加されました。 ... <看更多>