《人性嘅底線》陳心遙
《信報》2017年6月7日《視線所及》專欄
台灣大法官裁定，法律唔保障同志婚姻係違憲，有人從法理上反對，有人從道理上贊成。討論延伸到香港，有人選擇純以自己道德陣營嘅好惡，去贊成或反對。其中仲有個議員，引喻失義，借一個典故嚟講同志平權，無論有心定無意，字面已經令人覺得係用畜牲指涉同性戀者。
一直支持平權嘅朋友當然嬲到彈起，但係唔好唔記得，無論佢嘅講法幾低俗都好，另一邊都有人舉腳支持到底，因為有一部分人誓死堅持，同志婚姻，違背自己「人性嘅底線」。
如果係教育水平嘅差異，咁大家可以理解，自細到大培養嘅價值觀，關乎國族、身份、家庭、倫理，一旦成形，係好難改變嘅。但如果雙方都係知識分子，又唔係因為背後有利益關係，其實點都唔應該斷絕理性溝通嘅橋樑，或者一下子將對方打成宿敵，你死我活嘅。
早幾日，有學生覺得唔需要再悼念，引來群起攻之。其中都有人痛心疾首話「忍無可忍」、「觸及自己嘅道德底線」。學生嘅論述當然離完善好遠好遠，千瘡百孔。但係大人又其實有冇真心嘗試了解下對方諗法呢？定係只以立場先行，條件反應咁將對方罵倒。表面上好似你贏咗個debate，但係同樣地，將持類似諗法嘅年輕人愈送愈遠。
記得以前，當後生一輩只不過係鍾意睇吓啲日本動漫、聽吓啲日本流行歌嘅時候，總會有一兩個親歷日軍侵港嘅老人家，或苦口婆心、或義憤填胸咁責怪你善忘國仇家恨，認賊作父呢？話時話喎，幾時大家會為曾經捍衞我城嘅義士，討回一個認認真真去悼念先烈嘅香港重光紀念日，堅守「道德底線」呢？
問問，回想自己嘅過去，有冇幾回，大人一樣係用我「忍無可忍」、你「離經叛道」嘅口吻，嚟反對年輕時候嘅你嘅想法呢？當時你係咪已經口才便給、情理通明咁表達思想，說服對方，定係一樣覺得自己有理說不清、覺得自己被無理打壓呢？
如果有，今日可唔可以易地而處，唔好做番當年自己最討厭嗰種大人，放低自尊，聽吓年輕人嘅想法，唔好下下用上「道德」、「人性嘅底線」嚟抹殺對方嘅人格，消滅討論。真係日日講歪理冇人性嗰啲，你都未會或未敢去佢面前痛罵佢一餐啦。你當孺子可教又好，良心未泯又好，點解唔可以畀多啲耐性去傾吓？
我從來唔輕視人性嘅醜惡。但又有唔少經驗：好多時一啲以為立場南轅北轍嘅人，只要靜心傾吓，其實埲牆，又真係冇想像中咁厚，咁難以撼動㗎！
#人性嘅底線 #同志平權 #何君堯 #重光紀念日 #支聯會 #中大學生會 #六四 #信報 #陳心遙
