【講個故仔比大家聽】
Juno & Kay前排出左隻 Album。上架日期係18年12月12。我同7 結婚11週年。佢專登托HK朋友買左送比我。入面有呢隻麻繩介指。我好鍾意。因為我地同 董折浦銘心一樣。當年隨性地結婚。都係無買婚介。而佢都係響我讀大學既時候攪大左我個肚。我陀住呔仔返學都幾型架 hahahaa 唔同既係。我地既婚姻比較幸運...
2018年summer。摸到左胸有粒野。滑嘟嘟郁得既唔使驚。海膽咁lup lup突突 實左響度先係cancer... 8月尾返到美國即刻做婦科check up。叫醫生摸下個胸粒野 + 子宮頸抹片。都唔知原來對上一次做已經係4年前。其實生完仔都keep住年年做。呢D野我都跟得幾緊。到佢地上左小學 + 自己掛住做袋。miss左D check up又懶得打去約返。有時不了了之 ~.~
醫生摸左個胸話應該唔係cancer。但安全起見要去照乳房造影。即係好痛苦果D夾波波。要睇下佢入面係咪好大舊。有時摸表面未必摸得準~ 照完。係粒大約2.2cm的 纖維瘤。無增大唔使理。反正抽了出黎又可能會再增生。唔痛唔阻礙就由佢同自己共存吧。同D女人frd講開。原來好多人都有。好普遍的...
做完婦檢幾日後。醫生打黎。話子宮頸抹片異常。係CIN1 輕度癌前病變(比個名嚇窒) 。但因為check到 HPV positive 仲要係 type 16/18 果渣 高度致癌類型... 醫生好擔心。要我盡快返去做內窺鏡。要取宮頸細胞化驗。make sure真係 CIN 1 而唔係 2,3 果D。因為 2, 3 同1 既處理方法極之唔同。2, 3 係中度/ 嚴重病變要做錐型切子宮頸手術。唔做慢慢會變前期Cancer。而 1 就只需要半年後再 抹片。睇下自己D免疫力打唔打得低D病變喇！好彩check完出黎都係 CIN 1。就等半年後。即上星期再做抹片追蹤~ 不過單野都比醫生埋怨架喇。話我好彩。4年唔黎都夠膽死。如果係頭一年開始既。拖佢4年可能真係CIN 2,3 或者更大鑊。話就話 5-10年變化期。佢有Patient由 CIN 1 唔夠1年已經變左Cancer 第2日入手術室喇.... 抹片真係要年年做...
齋聽已經嚇到仆街... 好彩我身邊好多女人。我第一時間係去求救。婦科的朋友比我喪問問題。個人好慌架嘛一聽完。都唔知乜事 (已經扁晒咀想喊)。之後又響大group同班女人傾。真係好彩有呢班朋友。資料上又好。心靈上又好。經歷上又好。一直陪住我。我真係好感激佢地。你知道當你好無助既時候。一句 "痴線！無事既！！" 你真係會覺得自己無事架。多謝同我講過呢句 "無事既！" 各位朋友。話輕。但情意重♥
睇完大量 Google + 過來人朋友們提供資料。知自己發生緊咩事。個心定左好多。反而我老公好好好好好緊張。可能好驚個老婆會死... um... 老實講呢幾年做手袋真係發瘟既。平時睇開我都知我係有D工作狂。Brandsss開左4年。我通常中午去入貨。然後買餸接仔。做完一堆家務 + 煮飯。攪仔上床瞓晒。我就開始做自己既手袋工作。我諗我好耐無試過12點前瞓 or 同老公一齊瞓。多數做到2,3 點。而呢幾年積埋身體真係差左好多。易病。明顯feel到個人虛左。但由於我太熱愛工作。又不能唔做家務唔湊仔。唯有犧牲睡眠時間黎做自己野... 錢是鬆動了。又覺得自己對頭家有貢獻。但是用健康來換的....
4年鐵人生涯過去了。其實唔止4年。之前做童裝仲癲。凌4, 凌5 我仲覆緊email 屌緊大陸廠！但果時佢地未小學。我可以瞓得晏D。但都已經係燃燒緊健康....
我不嬲講。一個人可以幸福。係因為另一個人肯犧牲！你地睇我老公可以日日放工返屋企玩木玩到叫佢都唔入黎食飯呀。就知佢背後果件幾辛勞啦。不過.... 我都知佢返工辛苦既。weekend 又好肯湊仔。咁放工想做下自己野都可以啦。最緊要佢開心啦！加上我主力真係湊仔做家務。無理由話自己攪壇野之後要打亂屋企個生態架嘛。手袋係我自己鍾意做。又唔係老公叫我做。而其實佢成日話我唔夠精神叫我唔好做。唔通我仲好意思因為做袋 叫佢幫手平日D野咩....
好喇講返。老公真係好勁！自佢知道我需要休息。需要好身體 同 好既免疫力去消除病毒。佢就開始幫我做晒D野。佢開始幫我煮飯啦 (我想喊。因為我真係好拿憎晚晚煮飯。呢個係我10年8年來既不爽但又迫住要做 T.T) 係堅煮wor唔係煮2餐走人。佢而家仲煮緊... 之後佢會開始洗衫啦 (你地睇咩叫幸福呀？佢真係近排先識用洗衣機咋 搬左黎10 年喇。我發現佢乾衣無抓返塵網D dust出黎 xD) 佢焗紅棗桂圓水我飲啦。屋企野佢做得就做。我真係輕鬆左好多。好感動... 最大幫助係而家佢煮飯時。我可以做野。咁我就唔使再捱夜做。我岩岩呢半年都11點左右瞓。身體好好。連皮膚都靚埋！！響度都要好感激我手袋partner。當我話佢知我唔掂喇。黎緊手袋要放緩。可能做慢D會影響佢收入。佢即刻叫我多休息。早瞓唔好chur。揾錢都要有健康身體！我好感激。因我自己有事。我好驚累埋人...
自從老公幫我手做屋企野之後。佢多次同我講：乜原來你平時咁辛苦... 真係企足成晚響廚房... 原來灘響度等開飯咁嘆... 拿有D野真係要自己感受過先知果種痛苦。望落全職師奶好嘆。我覺得大家老公都應該做1個月家務野。咁就唔會再成挑挑剔剔個老婆！以前 7 發現我將佢D返工衫褲襪一齊洗會話我。要我點分點分。我而家咪又見佢擺埋一機洗！妖！所謂己所不慾勿施於人。將心比己啦有時D 野隻眼開隻眼閉....
好喇寫到成篇小說咁。快D 講埋。咪話半年抹片追蹤。睇下正常返 定再差左？ 我琴日收到醫生電話。話我 子宮抹片 & HPV 都正常返呀！！真係好好好開心。雖然之後知道其實 CIN 1 問題不大既。但而家係自己身體免疫 能夠消滅左D 病毒。真係覺得好興奮！！多謝老公呀 你照顧得我好好呀！！♥♥ 好多謝你既付出。好多謝你響緊急關頭變身成為超人。返完工已經攰 仲要照顧我同呔細... 呢半年好似養豬咁...
"我只想 身體健康 看著你替我蓋被
窩心得心有點痛 不忍你勞碌的照料我
眼淚這刻難自控... "
關於子宮頸癌前病變 & HPV。因初期病變全無跡象。到出血呀痛呀 果時已經係 中/後期喇！大家女人要年年做柏氏抹片check 住呀喂！
>> https://www.famplan.org.hk/…/abnormal-cervical-cells-and-ce…
http://www.ssm.gov.mo/hpv/qna.aspx?item=3_2
子宮頸抹片異常4 在 我收到醫院寄給我的抹片報告，說有抹片異常'' 這是在 ... 的推薦與評價
Herpes 皰疹病毒4. Human papilloma virus 人類乳突狀病毒5. Chlamydiae 螺旋菌6. Others 其它何謂抹片異常？ 但有時細胞在子宮頸表面呈現異常並非一定是癌症，且切記 ... ... <看更多>