【引人入勝】
久唔久都有人問我，點解要揸的士。真正嘅入行原因喺之前嘅訪問已經講過，唔晒位重複。除咗個人嘅理由，揸的士同各行各業比較，依然有其可取之處。
老闆、客户
對一般打工仔而言，腦細、客人嘅無理要求、人身攻擊，由返工嗰一刻開始就萬箭齊發，只可以承受，萬萬唔可以還手，除非做好辭職嘅覺悟。揸的士喺呢方面嘅好處真係無需多言，你幾時聽過的士佬俾乘客鬧？
同事
喺職場相遇而成為好朋友，大概一生人只有寥寥數位，隨時離咗職就唔會再聯絡。揸的士呢？同事可以成為戰友，分享柯打，共享情報；就算係唔識嘅仇家，至少立場鮮明，就係要搶客，唔會兩面三刀。
旅行
長時間嘅工作，去旅行鬆一鬆係好多人渴望嘅。可惜當有平機票出爐時，又要諗究竟有無假，有假又批唔批，No pay leave？辭咗份工就得。的士佬呢？有錢就可以去。你見逢賽馬日、足球大賽特別多紅的擺街就知。
食飯
返工飯堂，來來去都係嗰幾間。明明無乜交流，但唔知幾時開始，餐廳職員會記得你，甚至記得你哋嘅口味。至於我？十八區嘅美食劣食，真係試之不盡，去到邊就食到邊，就嚟可以寫食評。
冷氣
公司冷氣係非常人性化嘅產品，經常反映公司唯一「人」嘅心情，即係老細。永遠唔係太凍就太熱，雖然有少數人覺得舒服，但呢啲被選中嘅人真係少之又少，對大部分人嚟講，冷氣都係射波嘅原兇。的士車廂基本上係一個溫室，冷暖自由控制，就算乘客覺得熱或凍，態度好嘅就吓佢，最多都係頂一個鐘；態度唔好？sorry，冷氣制壞咗。
投訴
的士行業嘅投訴機制，大概係全港繼彈劾政府官員、投訴警察課以外，第三最難成功嘅機制。不同嘅係投訴司機不乏成功例子，關鍵係投訴人肯唔肯去投訴，落口供，只有百分百證明司機真係有錯，先會受到相應嘅懲罰。返工呢？閪客加上閪公司，你份工就會喺一次口角同一個電話之後失去，最明顯嘅例子一定係巴士公司。
保障
手停口停無保障又無強積金，大概係揸的士嘅最大缺點。不過有幾多份工嘅合約唔係年年續呢？就算做到飛上天嘅高層，咪又係話裁員就裁員。所以揸的士表面上無乜保障，事實上份份工都無。至於強積金，你check吓你個強積金户口上年蝕幾多再同我討論。
社會地位
「的士狗」嘅污名喺香港真係如雷貫耳，但兜口兜面指罵嘅實在少之又少，上客稍為畀啲禮拜，啲乘客個個當我稀有動物咁尊重。網絡上批評不絕，街道上嘅司機依舊自由自在（消遙法外）。的士狗好賤咩？係㗎，最慘係喺香港做好人邊有好下場，HA、Uber、一番賞、夜市⋯⋯與其喺公司穩穩陣陣做打工奴隸，或者搞創意生意然後變階下之囚，不如揸部的士落場做賤格嘅自主皇帝。港道無親，常與賤人，唔係話揸的士就要做賤人，但至少你有得揀。
你問我打工好定揸的士好，同薪金階層嚟講，揸的士一定無得輸。喂，打工有晉升階梯喎，咪搞笑啦，實升你㗎？
#lazytaxi
#的士
#taxi
#我的你的紅的
