［Sha la la la Sha la la la la la］星期六，講呢啲。
1. 其實好似唔係好關我事？但就係又關我事。最初收到email 時，都有啲愕然，乜鬼CP Job？我以為係泰國CP（雲吞幾好味的說）
2. 呀，CP，Classified Post，南早的東西嘛。中學燒嘢食最鍾意拎嚟透爐，特別係當年好似有鄰居會掉出走廊。後來發現買份星島抵啲。Classified Post改名多年了，我當然係知的。有用添，否則點會收到個email呢？賣盤了，賣畀Venture Building Group。唔知乜水，不必深究，雖然我唔明做乜Building Group要買米報。
3. 呼，「米報」，真係時代的眼淚。三十歲以下嘅應該唔知係乜，應該以為米埔（定連米埔都冇去過？我估有嘅，要打卡），或者梁柏堅Rice Post
4. 龔耀輝在《國金外望》講過，中環才俊嘅，唔使搵工咯。一係獵頭搵你，一係個客搵你。後者我冇試過，前者有（大把人都有），傾成咗嘅都唔止一次，但最後成功上轎令到人有得分錢嘅，零。
5. 但，總係要有過個程嘛。
6. 埃汾職場生涯，medium有一大堆文講（http://bit.ly/2lmLrLc ）。但簡單講（知嘅可以跳下一段），埃汾英國讀Master，01年911時回歸，雙失一年，02年開始返工．我教咗兩間中學，04秋天轉行去蕉行做炒房交易員，06春天年轉到耆英證券做分析員，打後咁多年都係做股票。14年頭耆英證券炒人，本人被炒。同年春天去咗東亞某間子公司，冇耐間公司畀台灣佬買咗。然後17年夏我為咗證明自己實力，去咗坡資星矢圍高達，18年秋證明咗果然係冇實力，自行裸辭。做過短時間嘅中年slash，幫過兩個朋友，然後19年春去咗而家公司。
7. 教書嘅兩份，蕉行，仲有耆英，我都係睇米報搵嘅，就係寄信（後來係email）。耆英之後嘅，就冇經米報搵，米網都冇—我當然有用，但之後每一次都唔係用米報米網而轉到工。東亞某子公司嘅，係耆英高人介紹，真係好似拍戲咁，我走嗰日在星街大排檔，佢同我飲奶茶，忽然塞張紙畀我：「你打話畀呢個人，佢會幫到你」。然後星矢圍高達，係我耆英嘅舊同事引薦。我唔係under佢，但我跳過晒個過程。中年slash嗰半年，幫朋友，就固然係朋友搵我。而家公司呢？就係東亞子公司年代嘅老細搵我。
8. 換言之，你睇到耆英就係轉捩點。可能係因為我叫做「上咗位」，但亦因為做咗好耐，八年，兩者有直接關係。所以咁多份工我最有感情，喜怒哀樂都有，畢竟八年係好長嘅日子。我對我老闆兼師傅老馮，耐過我成世對住我老豆（暫時），日見，夜見，星期六日都見，仆街年初一都見（而你唔知分析員係年初一都有人返工的）。我買樓，結婚，經歷金融海嘯，第一次出花紅，第一次被炒，全部在嗰度。
9. 然後打後幾份，就進入咗一個舊老細／舊同事／朋友搵我過檔嘅年代。值得開心嘅，因為算略有小成（http://bit.ly/2ZhNG1n）。至少證明你個人唔係十分非常極之唔掂。嘔血嘅人老細就算有權力都未必會炒，因為有時炒人都幾煩，但你係唔掂嘅，總唔會分開咗仲搵你返嚟篤眼篤鼻。
10. 唔好意思，講遠咗。其實我係想講，米報。實體嘅米報。
11. 蕉行年代，就係我睇得最多米報嘅年代。原因好簡單，首先當時仲係剛剛米報變米網唔係太耐，雙線並行。二來亦因為我打金融工。之前教書，搵份明報就得啦。咁當然我雙失年代都好似買米報，但真係唔同
12. 點唔同？就要講，當年蕉行呢，係分長短週嘅。咁唔係好出奇，當年好多寫字樓工仲係長短週，所以我當年新聞組有個「邪惡軸心」嘅節目，星期六上午大家就去吹水。
13. 但，本人係做交易員嘛，Treasury（資金部/盤房/炒房），大佬，星期六係冇trade的，你有冇見星期六有HIBOR丫？所以，就係返去玩手指。或者做文書嘢—即係唔做。而Treasury都返星期六，十分反智，當年阿頭標哥個個星期屌，但形勢比人強，都係就範。但後期佢見我正正常常，就唔理了，等我幫佢打卡。
14. 星期六返工有乜做？除咗食早餐—買返公司食咋，而平日唔得的，標哥有潔癖，會屌。就梗係，睇米報啦。當年我就買齊三份，就係Classified Post，Career Times，同埋……一路都諗唔起邊份！（＊）
15. 然後食完早餐？就刨晒佢。重點當然係紅筆一支，仲要係粗身紅筆，唔係教書改簿嗰啲。睇啱嘅，紅色圈住佢。好有畫面。冋後來咩clip/save to my jobs真係爭得遠
16. 然後？就梗係print信。唔係你以為公司嘅printer用嚟做乜？星期六最多呢啲嘢，總有幾條盲毛印咗唔記得拎，或者印到一半老婆打嚟咁。就會畀人發現了。當年好似仲係寄信同email並行。當然任何一個人都會學識print 信封，或者label，或者至少Word整個table印出嚟再貼相封。
17. 想講嘅係，當年其實都未係好睇經濟，甚至唔係好睇新聞，財經版唔多睇（而走去做交易員，真好嘢）（＊＊）。但睇米報，就自然知道經濟好唔好。好景時，嘩，厚到極，大把好工（請唔請你一回事），圈足一朝，玩到printer jam紙。唔掂時，得兩叠，仲要唔係保險經紀就Financial Consultant．
18. 而我仲記得，最初仲有個女同事同我一齊返星期六（還不錯的說，但冇搞上，佢大過我人工高過我），嗰時都傾得埋，就直頭米報兩份睇。諗落其實都幾無聊又大愛，大家工作差不多，又不過大我一年，人工可能高我兩千？其實係直接競爭對手。
19. 以上一切一切，對我嚟講，雖然未係彷如隔世。「但是這些簡直就像沒對準的描圖紙一樣，一切的一切都跟回不來的過去，一點一點地錯開了。」
20. 而家，唔好話米報，我懷疑米站都好難做？某程度上都係多得科技，去中介化。甚至連獵頭都上去拎煙，仲有乜嘢講？但，正經諗下，如果個獵頭只係上去拎煙嘅，咁，做乜我公司唔自己上？你仲有乜價值？我自己唔識上？同一個比喻，記者可以網上抄文，但如果係咁玩嘅，咁作為讀者，你仲有乜價值？我自己唔識上？
21. 當然，又唔會話死晒。高檔嘅獵頭咪有得玩，同各種中介（包括媒人，扯皮條，咩都好）一樣，大刁，啲人咪需要一啲純科技畀唔到嘅嘢。即係你見球探呀，足球經理人之類，都仲存在。但，如果係普通小型班嘅，就真係玩「足球經理人」算啦，好似幾舊水之嘛。
22. 當年見過個鬼佬獵頭，堅係pro到一個點，佢pro到可以出newsletter話你知邊個去咗邊。勁到係我同佢傾，佢可以盤完我性格，期望，知完我做乜後，幫我有邊間可以試。佢完全知道同行邊一間行，邊個做緊阿頭，邊個就快走，邊度想開新添請人。真係勁到西飛利。人地呢啲，本行出身，賣嘅係佢咁多年嘅撈烤同叻鑊勁，真係唔會為賺你一兩單佣推條廢柴去做衰自己個名
23. 呢啲就唔係啲英美紐澳加三流大學返嚟嘅小妹妹（sorry）可比了。唔止一次，真係我要教返個小妹妹，咩叫sell side 咩叫buy side。Research Analyst係做乜，點解公司要請。你想像下等於你做球探或經理人，而你唔知前鋒同後防有乜分別，點解要有條友守龍門，咁上下。初期我會當睇女識女咁同佢地癲，後期就真係不要浪費老哥我時間。我寫多篇文好過啦。正所謂，人必自侮然後侯姆斯。
（＊）最後發現，呢份嘢叫做Job Market。仲要其實題目嘅嗰首歌，係Job Market 而唔係 Classified Post。唔知係佢失敗定我失敗，廣告本身我好記得，但唔記得係邊間公司。應該係畀錢落廣告嘅惡夢。
（＊＊）真人真事，唔怕畀你笑下。當年美國大選（＊＊＊）嘛，呀標哥在刨Financial Times，就問我，喂呀埃汾，你熟唔熟美國Electoral College 嘅嘢。我以為佢問升學，結果佢就「屌～～」一聲。呢個故事我會同而家啲小朋友講，話畀佢地知，當年我都係十分蕃薯嘅。
（＊＊＊）其實唔鍾意星上星，但都係要講。當年另外有個同事，番書仔。美國大選嘛，咁此人唔係好得標哥歡心，後來被炒，但又唔知標哥唔鍾意佢。成日就主動講嘢。例如美國大選live score（當年已有），佢同標哥講：「標哥，布殊輸咗賓洲呀」。標哥就答佢「咩賓周？你嗰條？」
my jam意思 在 That's my jam. = 那是我的最愛。 電影Pixels, 世界大對戰例句 的推薦與評價
That's my jam. = 那是我的最愛。 電影Pixels, 世界大對戰例句: **************************************** Pac-Man? Boom, that's my jam. 小精靈? ... <看更多>