多出戶外工作，又成日用手提電腦上網做嘢嘅朋友，相信對於 Pocket Wi-Fi 都唔會陌生。隨住香港推出 5G 服務，華為就推出咗呢款 E6878 5G Mobile WiFi Pro。今日就同大家做個開箱！
打開箱，就見到呢部 5G Mobile Wi-Fi Pro 嘅真身，Size 比想像中大，配件方面，除咗說明書，亦都包括咗一個支援快充嘅充電插頭，同埋一條傳統大頭去 USB-C 嘅充電線。
講返部機嘅大細喇，拍埋同牌子上幾代嘅 Pocket Wi-Fi 比較，呢部支援 5G 嘅 Wi-Fi 蛋的確大咗好多，只係細過旁邊部 iPhone Pro Max 11 少少。不過再睇睇數據，新機內置咗 8000mAh 嘅電量，比以前只有千幾到三千左右嘅電量明顯加大咗好多，咁唯有喺大細上面作出啲犧牲。
呢部機嘅 SIM 卡位係喺機身嘅側邊，使用 Nano-SIM，不過就唔使用針拮，只要揭開個蓋，將 SIM 卡推入去就得喇。要換卡亦都係推一推，張卡就會彈出來。華為上一代嘅 Pocket Wi-Fi 都仲係用緊 Mini SIM 大卡 同埋 Micro SIM 中卡，今次支援 Nano-SIM 相對就方便好多，唔洗再用卡套或者怕張卡「卡」住喺卡槽入面。
盒上面有張貼紙，係部機嘅預設 Wi-Fi 資料，搵手機駁好咗之後，可以用瀏覽器打指定嘅 IP 地址，或者下載 華為智能家居 呢個手機應用程式操作。不過未睇呢個介面之前，不如先試吓呢個 5G 嘅 Wi-Fi 連線先。
正如網頁所講，以 Wi-Fi 接駁呢部 5G Mobile WiFi Pro，最高嘅速度只係支援 867mbps，要去盡呢隻 Wi-Fi 蛋嘅最高理論下載速度 1.65Gbps，就一定要透過 Type-C 線連線先得！不過香港嘅 5G 網速喺大部份情況之下都去唔到咁快，大家都唔使咁介意。
介紹吓個介面，基本上一般路由器嘅功能都可以喺 App 入面搵到，Wi-Fi 設定亦都好簡單。可能因為我手上呢部係行貨嘅關係，當我放本地嘅 SIM 卡落去之後，都可以自動設定啱用嘅 APN，唔使再手動設定先至上到網咁麻煩，對於唔熟手嘅朋友嚟講，就更加方便喇。
部機本身亦都配置咗一個單色嘅 Mon，雖然唔係 Touch Screen，但係都可以透過機身側邊嘅兩個掣操作常用嘅功能，最特別嘅就係可以顯示一個連接嘅 QR code，無論你用緊 iPhone，定係 Android 手機，只要嘟一嘟，就可以馬上連線，唔使手動輸入密碼咁麻煩！
8000mAh 嘅電量，亦都可以充當行動電源嘅功能！唔好以為只係支援有線嘅反向快充，呢部華為 E6878 5G Mobile Wi-Fi Pro，連反向無線快充都一樣得㗎 ！之後就唔駛特登帶多嚿電出街啦！
唯一要留意嘅係，根據官方網頁嘅資料，呢隻 Wi-Fi 蛋嘅 5G 頻段，喺香港只係支援 N77 同埋 N78，電訊商有可能喺未來將現有嘅 4G 低頻段改為 5G 使用，呢機就配合唔到喇！
《Z世代達人》
麥卓華
#E6878-370 #香港5G #E6878
