陸永出年有獎攞？
大台演員想在《萬千星輝頒獎禮》攞個獎，除了演技要有進步外，高層安排的曝光率亦係關鍵因素，幾年都無套劇出，點俾獎你，演技識飛都無用。根據去年的套路，演員要攞獎最緊要劇集連續出或者同時出。張振朗一連出五套劇，王浩信兩套劇相近時間內連續出，分別獲得最受歡迎角色和視帝。白彪一晚四套劇同時有份參與，蔡思貝兩套台慶劇，由8:30-10:30都是同時做女主角，於是一個獲最佳男配角，一個做視后，根據這種模式，現時連續兩劇《七公主》同《智能愛人》都係主角的陸永，出年有獎機的可能性唔細，而且他的演出交到貨㗎。
在他主演的兩套劇中，個人會覺得《智能愛人》好看一些，《七公主》主角多，多元化些，但線同戲都唔多連貫，一時認真打官司，轉頭我為情狂，跟住美少女戰士同剝光豬搞笑，照搬韓國電影《上流寄生族》橋段條線開左頭又停幾集，劍擊條線去到第十集先開始，連同陳瀅一齊出現，條條線都個別發展，條尋親/親情主線反而比較薄弱同唔連貫，未去到「七國咁亂」，但無乜重心。
《智能愛人》基本上類似郭在容導演，綾賴遙主演《我的機械人女友》(2008)和是枝裕和導演，裴斗娜主演的《援膠女郞》(2009）這些作品，一個對人類感情毫無認知的機器/公仔，續步愛上人類，發展不可能愛情的故事。《智能愛人》的故事較簡單集中，較容易令人入戲，不過，大台為了30集，自然加入大量親情同三角戀線入去。相對上，近年AI人工智能的發展，令機械人有感情變得更有說服力，Ali演出的阿寶演技上值得肯定，大台的特技預算亦難以將她變得更似機械人，去到占士金馬倫的《銃夢》用CG做主角更加無可能，所以是收貨的，首度擔正男一的陸永，劇本遷就晒他的性格去寫，發揮得唔錯了，阿寶的續步變化，亦交代得算自然合理，只嫌30集太長，好多位在拖，麥美恩同「後生仔」陸皓段戲，蔣志光被懷疑偷錶段戲，都覺得可以爽快些，另外，蔣志光做保安那個商場景太舊同低檔，和AI年代唔夾。看看劇集的主要劇情，其實20集已經足夠。
陳翹英老師近來喜歡上高科技故事，先在ViuTV監製單元劇《理想國》，之後又重返大台搞《智能愛人》，下一套唔知會否繼續？如果搞《理想國2》，個人會較喜歡，因為多點多元性和創新，但前提都要ViuTV加些製作費，等製作好睇些。
#智能愛人 #七公主
