關於 西維爾球員名單 ，我們在網路上蒐集到這些相關的討論、資訊與評價

【球會消息】
.
有幾單球會消息想同大家分享下，先係UEFA啱啱公佈左年度最佳球員以及年度最佳教練三甲名單，當中車路士分別有簡迪、佐真奴以及教練杜曹入選，上季藍軍相隔九年後再次成為歐聯冠軍，無論兩位球員還是主教練杜曹都功不可沒，而其中佐真奴更喺之後既歐國盃為意大利再次贏得多一個冠軍奬盃，絕對可以係個人豐收一年，不過無論最終邊位球隊成員獲奬，都會為佢感到高興。
.
至於另一位近期人氣相當高既後防小將查路巴，獲得杜曹確認來季將會留隊發展，感覺上後者對於查路巴既表現有相當高既評價，加上哩位小將無論喺場上展現既個人特質以及態度都非常正面，相信係位置排序上更會力壓蘇馬優先出場，至於傳聞所收購既西維爾中堅觀迪，近日指球會正在繼續處理有關收購，而前題係先希望出售蘇馬釋出人手空間以及轉會費，稍後時間亦會出文講下蘇馬喺球隊既處境。
.
最後就到轉會消息方面，喺收購盧卡古及處理其他球員同時，球會亦正出售或借出部份杜曹覺得不合適既球員，除左一直都賣唔出既真禾達、美亞斯卡果啲之外，一隊中亦有部份人手需要釋出，而左閘位置既艾馬臣亦確定以外借身份轉投法甲里昂，上季喺收購捷維爾後其實球隊都經已擁有三名左閘球員，不過自杜曹接手以黎都見得到佢係偏好馬高斯阿朗素居多，主要因為球會較為熟習於左翼衛既位置，令艾馬臣既處境相當尷尬，即使同樣為意大利贏得歐國盃無奈地亦無助球員留隊發展，而今次轉會既借用條款當中里昂係擁有優先購買權，希望艾馬臣喺法甲發展順利，至少可以獲得穩定既上陣機會。
.
《岩睇既比個Like支持我地啊！》
作者 : BluexLion車迷手記
圖片來源 : UEFA Offical、Football.London、Olympique Lyonnais - OL Offical
-------------------------------
同場加映《恨鐵不成鋼 生涯愈走下坡的山寨王 - 巴舒亞伊》
https://s.fanpiece.com/l4r49xL
.
#Chelsea #車路士 #佐真奴 #簡迪 #杜曹 #查路巴 #艾馬臣 #里昂

《咎由自取的失分 抹煞前線的努力 車路士對修咸頓賽後分析》
.
由三分變一分，相信除左令一眾睇住直播既球迷氣憤之外，對場上經已付出足九十分鐘既球員黎講亦難掩一份失落，個別球員「自殺式」犯錯可以話埋下失分既伏線，亦同時抹煞左前線球員喺比分上既努力，其實哩啲學費都已經交左接近一季去到依加都仲交緊，身為主教練既林伯特需要負上不能推卸的責任。
.
繼續源用4231陣式，正選陣容上有佩利錫正式復出，令添姆雲拿可以回歸正箭頭位置，身後支援既亦繼續係夏弗斯，而蒙特就依然兼任左翼鋒角色，雙中場分別用左佐真奴配搭簡迪，至於四人防線就用上蘇馬同基斯甸臣為中堅組合，賽前傳出有小傷既捷維爾亦趕及復出同艾斯派古達擔任左右兩間，而門將就由基柏接替於國家隊訓練時受傷既文迪，堤亞高斯華就因倦勤而並無在賽事名單之中。
.
以結果論黎睇著眼點過份側重於個別球員既失誤而引致既失波，但其實今場波理應平均分為入球與失球兩部份黎睇，雖然最終都唔能夠全取三分，不過喺進攻層面上其實有唔少值得觀賞既看點可以分析，先講組織攻勢，過往車路士由後場開始組織主要都以短傳同地面戰為主，不過自捷維爾接任左閘正選後，好多時後場既波都會經由右閘到中堅再到佢腳下，而捷維爾既視野同能力可以省略左中場轉換直接將皮球傳上前線發動攻勢，比起中堅同樣以長傳方式唔同既地方係，哩位英格蘭左閘除左可以選擇向前傳上邊線之外，亦可以以拋物線方式彎入中路，變相令進攻套路更加多元化。
.
由於添姆雲拿偏好走向左路發展，多番見到佢成功接應到捷維爾既長傳，德國人回歸正前鋒後可以得到更大既活動活間，可以令佢專心於前線捕捉機會，而今場波兩個入球亦見得到添姆雲拿既個人質素，早前亦多次強調球迷們無需過份擔心佢會有步向莫拉達後塵既機會，因為兩者係截然不同風格類型既前鋒；至於喺佢身後既夏弗斯亦漸入佳境，繼續以前場多面手既角色串聯攻勢以及為隊友製造機會，更同雲拿一樣正式取得英超入球，而佐真奴亦終於「擦出」助攻。
.
略略講完組織同入波喺進攻層面上既野之後，就係時候到令人氣憤既失球部份，而喺哩部份之中亦可分為兩個範疇，除左場上球員既失誤之外，另一個位就係林伯特既安排同臨場部署上同樣都存在失誤，先講前者，睇返三個失波，除左最尾禾確特彈射命中隊友改變角度入網果球略有幸運成份之外，前兩球都係由於球員個人失誤所造成，先由夏弗斯於中後場區域推失波所致，當時睇到哩個畫面之後第一時間令人聯想起巴克利過往既犯錯，同樣地係喺接近哩個位置推失波，其實唔係唔比你向後推，但係喺哩個位推真係好危險，基本上一推失就等同伏左後面既隊友，哩方面夏弗斯就真係要交下學費。
.
至於第二球失波，亦係大眾球迷著眼同車迷們氣憤既一球失波，蘇馬回傳力度不足派出「醫院波」，同時基柏喺禁區內撲救存在猶豫，撲救失敗後雖然有基斯甸臣試圖解圍，但最終都被對手以半空門方式射入，如果單計責任的話，蘇馬同基柏兩者難辭其咎，前者犯錯後無嘗試起跑跟返轉對手彌補自己既失誤，返而覺得龍門應份地幫佢補鑊，至於基柏既心理狀態其實都已經打唔起，多次自我犯錯或被防線「放伏」到就連自信心都無埋，而其實喺哩球失誤之前兩者都經已出現過誤會畫面，當時蘇馬呼喝基柏出黎將皮球沒收，其實果下對手都唔算壓迫得蘇馬太西利，理應自己由能力轉身再組織過，而基柏本人都覺得無必要出龍，蘇馬幾時變左後防大佬連出龍都可以由佢叫？場外人都睇到兩者明顯存在心病，對一條防線黎講絕無半點得益。
.
最後就講到林伯特，要講既野亦唔會比球員少，先講防守佈置，佢都執教過左一季時間，球隊依然喺防守死球時存在明顯漏洞，今場波對手兩下死球時都能輕鬆地喺禁區頂位置施射，而哩個區域係並無任何藍衫球員進行防守，變相只要解圍不遠，對手就可以有空間輕鬆起腳，防守唔洗教都唔識教係兩件事黎，而林伯特好明顯係後者；令一個問題就係臨場調動，其實球隊喺下半場已經開始失去壓倒性優勢，尤其係喺六十分鐘打後形勢已經交到修咸頓為主導，但感覺上林伯特好似無乜目標咁，換完薛耶治入黎就等完場咁，去到下一個換人已經係要數到八十六分鐘既占士，果時其實未被對手扳平已經係好彩。
.
你要縮既，其實理應六七十分鐘要開始換人縮，如果你要谷多粒既，就早啲換艾巴咸入黎跑下，唔係去到九十分鐘先換佢入黎踩下草咁，你臨完場前先換佢入黎請問有咩用？感覺上林伯特喺球隊仲係些微領先3:2果時係完全無方向，完全無任何為球隊再鞏固形勢既目標；最後一樣想講既就係喺戰術安排上，喺國際賽前對水晶宮時都有睇到同講過，果場波球隊既中前場除左做迫搶之外，亦好肯落腳去制止對手製造攻勢，講緊既係對手連半場都未過到時已經被打斷，果時明顯見到球隊係有刻意咁做，但今場波完全見唔返哩樣野，中前場肯落腳既就只有簡迪一個，其餘人就淨係企位迫之後就再無其他跟進動作，都講過咁做既話變相令對手好輕易咁透過短傳就破解到你哩招，無系統性既迫搶只係掛羊皮賣狗肉，亦無助為後場減壓。
.
學費唔係唔想交，而係交到有冇意義，都經過左一季多既時間，陣容上亦都有補充同提升，但內容上依然都好似維持原狀咁，失既波都依然繼續都係咁，根本上只係等邊位球員犯錯，而林伯特就好似永遠立於不敗之地咁既樣，如果係咁的話前線入幾多球，後面都真係同你失番咁多球。
.
《岩睇既比個Like支持我地啊！》
作者 : BluexLion車迷手記
-------------------------------
同場加映《令車迷們「瘋狂」的一個暑假 淺談藍軍大灑金錢的一個轉會窗 – 後場篇》
https://bit.ly/2T6r2YE
.
#Chelsea #車路士 #修咸頓 #英超
https://s.fanpiece.com/nnT7mUh

【官方消息】
.
轉會消息浪接浪，繼捷維爾加盟後，官方亦係昨晚同剛剛公佈沙亞(Malang Sarr) 以及堤亞高施華加盟既消息，可以話連續三日有三單登鵰...
.
先講沙亞，球員係以自由身身份從法甲尼斯加盟，而車路士官方亦同時宣佈球員將不會立即歸隊，會先外借一季吸收更多經驗，不過就暫未公佈會外借到邊一隊，有傳有機會歸入收購最後一單最為熱門既轉會，利華古遜前場球員夏弗斯既交易之中。
.
先排除沙亞既個人能力同喺法甲既表現，單以免轉會費加盟以及左腳球員經已值回票價，球員亦曾經與曼聯、阿仙奴、熱刺等球員拉上關係，不過最終選擇有實際行動既車路士成為下家，而以球會角度沙亞會定位為球隊既未來投資，年齡上亦比起陣中「四大中堅」為年輕，如果喺下季外借表現出色的話，絕對有機會返黎頂替佢地入面其中一人...
.
至於另一單交易亦同時係免簽身份由巴黎聖日門加盟既堤亞高施華，之前仲同網友講話覺得哩單轉會唔成事😂，點知最後真有其事都不禁笑左出聲...
.
早兩個post其實都歸立左一啲施華加盟既原因唔再喺哩度重複，反而想特別重點講下球員以哩個年紀都選擇黎英超接受挑戰，其實都真係非常難得亦值得球迷們敬佩，以一個唔係龍門而係中堅哩啲核心位置，選擇喺職業生涯既晚年再挑戰進一步既聯賽，以施華既級數同過去既經歷黎講其實可以大安旨意去挖金，無必冒風險黎英超破壞自己既黃昏之年，可見到球員既爭勝心好強，亦同時希望入選球員生涯之中最後一次為巴西出戰世界盃既名單之中...
.
另一方面球迷較為著眼於施華既年齡能否適應英超，以及用送走大衛雷斯卻換來一個更老既施華黎作形容，喺度想花多些少篇幅分享個人見解，首先以雷斯作比較實在笑而不語，爆炸頭與施華兩者級數差距，個人認為二人至少差兩班波，施華無論喺能力、路數、經驗、以及臨場判斷哩幾方面都比起雷斯優勝，而同時前者無論喺AC米蘭還是PSG年代都擔任過隊長一職，領袖氣質同經驗甚至可以話比起艾斯派古達豐富，相信絕對能夠為「四大中堅」分享經驗，訓練果時教下佢地路數都已經值返條數喺度啦已經。
.
講真哩幾晚真係登鵰登到有啲攰，不過黎緊仲有一單最為重磅亦相信係今個轉會窗最後一單轉會，即管又睇下會唔會發生，拭目以待！
.
題外話官方其實真係好唔Fair，捷維爾加盟一個IG 7個postz，沙亞加盟得一個咁大把😟，真係好偏心英人呀..媽！！！
.
圖片來源 : the chelsea chronicle & Daily Mirror
-------------------------------
同場加映《被遺忘的「出租車」一員 繼續人球生涯倒不如痛快了斷 – 巴卡約高》
https://bit.ly/3aV2lX2
.
#Chelsea #車路士 #沙亞 #堤亞高施華