《前夕》
♂：早晨
♀：早晨
♂：我想同你講，我好撚緊張
♀：笑，做咩咁緊張啊，講比姐姐聽
♂：聽日我將會見一個好重要既人，仲緊張過見工
♀：你咁直白既，我覺得你份人愈來愈直接
♂：對你我覺得直接好，而你都係喜歡直接，你要我直接讚你，直接講我喜歡你，直接講我心入面既感覺
♀：係啊，所以你做得好好，我好喜歡
♂：你會唔會緊張？
♀：講真，有少少，我怕聽日你見到我會改變左依家我好喜歡既一種關係
♂：我都有少少驚，甚至有諗過，不如唔見，令呢種關係一直維持落去
♀：然後呢
♂：諗完一輪，我覺得關係從來都無永恆，一係昇華，一係流逝，我希望我地可以昇華到另一種關係
♀：咁咪得囉，做人有太多事要面對，逃避只係迴避左問題，有機會引發新既問題，我希望可以同你一齊進步
♂：聽日，你有冇咩計劃？
♀：交比你決定啦，你專業黎喎，我聽日可以完全受你擺佈，呢種機會唔多，你要好好表現啊！
♂：等我諗下……
♀：慢慢
♂：約九龍區可唔可以？12點鐘？
♀：可以啊，我都要花少少時間打扮
♂：要以全盛狀態出現？
♀：當然，要震懾下你！
♂：但我諗住都係好平常咁出現……睇黎我都要執執個樣
♀：你會想我著乜？
♂：唔……我無特殊喜好，你著返平時你會著既就可以
♀：你喜歡裙定係褲？
♂：我喜歡你
♀：好，咁我決定，你唔好後悔啊，你想睇我著乜我有既都可以著比你睇，唔駛講乜唔著最好睇，不過咁低層次既答案，我諗你都唔會犯既
♂：第一次見你，我想見到最你既你
♀：好，咁我就比你睇下我係點既
♂：我諗左個活動，聽日我地唔相認，每人訂一個尋人遊戲，我諗好左我個方式喇，我地聽日係商場入面各自行街，隨心咁影相比對方睇，話比對方知自己係邊，做緊乜，而過程入面，我地需要為對方買一份禮物，影完相就唔可以停留，一定要離開呢一層
♀：聽落好有趣，咁我都諗到我既遊戲係點喇！咁如果比對方搵到的話，有咩獎勵先？
♂：無獎勵，又或者係，想比咩獎勵就比咩獎勵
♀：Challenge accepted
♂：我訂既就係咁多，遊戲以外既，就隨感覺而做吧！
♀：其實我係好隨心既人，但我覺得呢個遊戲好有意思，見唔見，睇緣份
♂：聽日大家全心全意咁享受呢個遊戲就可以！
♀：咁今日就講住咁多先，呢一晚，我地留返少少幻想空間
♂：好，我聽日話你聽，我幻想既係點
♀：時間真係好快，我地竟然會見面
♂：長傾不見，已經打破左一半，而另一半，我希望永遠都留低
♀：我一早就知我地會見，因為否定詞加否定詞，就係肯定詞
♂：係咪即係負負得正
♀：我只可以講，講不見既人，都希望可以見到，只係，將唔想見既人排除在外，可以留低既先係最珍貴
♂：聽日，不見，不散
♀：好，不見，不散
♂：晚安
♀：晚安
♂：明天見
♀：明天見
——
長傾·不見 第一回 @筆友
https://bit.ly/LongchatEP1
長傾·不見 第三十三回 @燒書
https://bit.ly/LongchatEP33
好久 不見 第一回@久違
https://bit.ly/LongtimeEP1
好久 不見 第十一回@響
https://bit.ly/LongtimeEP11
#好久不見 #長傾不見
