#經典傳奇系列 【巴治奧的下半場】
巴治奧的上半場： www.facebook.com/ChungChiKwongchannel/videos/514026422875732/
聽到球證雞聲，巴治奧嘅下半場開波！
世界盃過後， 巴治奧嘅足球生涯可以話係急轉直下， 受到內憂外患困擾。 對外， 被千夫所指， 意大利國家隊嘅教練沙基指責佢係意大利未能奪冠嘅最大罪人，對內， 受傷患困擾， 被迪比亞路取代咗喺球隊嘅位置。
一季之後， 佢離開咗祖雲達斯， 轉投ac米蘭，効力咗兩個球季，期間，喺1996年，隨ac米蘭訪港，當晚大球場紅旗高懸，坐無虛席，喺佢領導下，以七比零大勝快譯通，呢場波可能係香港球迷，對佢效力AC米蘭期間，最有印象嘅比賽，事實上，喺呢段時間，佢狀態低迷， 結果敗走收場。 之後轉投中型班博洛尼亞。
喺博洛尼亞既一年， 巴治奧重拾狀態， 全季攻入22球， 係佢足球生涯入球最多嘅一季，憑住呢季出色嘅表現，佢再次被選入國家隊，出戰1998年世界盃。
喺第一場對智利嘅分組賽，佢先係接應長傳，跟住第一時間，球不著地助攻俾韋利板成平手，呢個助攻，無論力度、時間都妙到毫巔，充分體現到巴治奧嘅足球智慧。 到咗臨完場階段， 當時落後嘅意大利獲得一個12碼，巴治奧企喺十二碼點，一射破網， 同時亦都將呢四年嚟嘅烏氣一掃而空。
僅僅用咗一場比賽， 巴治奧就再次證明咗自己嘅價值，喺之後既比賽， 佢繼續有出色既表現， 只可惜，喺8強被法國憑12碼決勝而淘汰出局。
世界盃結束之後， 巴治奧滿懷壯志， 黎到國際米蘭，當時唔少球迷都期待住巴治奧， 韋利，朗拿度呢個組合可以稱雄歐洲。可惜事與願違， 佢同教練納比嘅緊張關係， 令到一切盡成泡影。
到咗2000年， 球員生涯已經開始步入黃昏嘅巴治奧黎到升班馬布雷西亞，意想不到嘅係，巴治奧竟然喺球員生涯尾聲，終於搵到一片最適合佢發揮嘅樂士， 喺呢度，佢可以盡情發揮佢嘅想像力， 無拘無束咁喺綠茵場上揮灑自如， 踢出充滿激情嘅足球。
可惜歲月不居，時節如流！
2004年5月16日， 喺聖西路球場， 37歲嘅巴治奧決定高掛球靴， 參與咗自己球員生涯嘅最後一戰，89分鐘, 當佢被換出場嘅一刻。 全場所有人都歡呼鼓掌，歡送巴治奧。 ac米蘭嘅隊長， 國家隊嘅老隊友，馬甸尼亦都走上前擁抱至意， 結果喺全場震耳欲聾嘅喝彩聲之下， 神奇小馬尾正式成為歷史。而球證雞聲一響，巴治奧嘅下半完滿結束！
即使球員生涯顛沛流離， 又曾經備受千夫所指， 但係都無損巴治奧喺球迷心目中嘅崇高地位。
當面對挑戰既時候， 佢依然不屈不撓，屢敗屢戰。無論係面對傷患既時候， 抑或面對球迷質疑嘅時候， 佢都可以用精湛技術以及對足球嘅熱誠黎戰勝呢啲挑戰。
自從巴治奧退休之後， 係亞平寧半島，已經好難搵到一個好似巴冶奧咁嘅球場藝術家， 咁樣嘅球場鬥士。
https://youtu.be/H3glnZfiNOs
請給點鼓勵，訂閱我們！
--------------------
我開咗ig啦， 歡迎各位老友一齊入嚟吹水!
https://instagram.com/chung_chi_kwong
