【認真討論】撤，咁又點？
一，有人話，特區政府同一整代人為敵。我贊成呢個講法。
二，今日睇返2014年雨傘運動，就好似一場預演。問題係，下次香港再出現社會矛盾，會點？
三，反修例運動，令我印象最深刻，係好多我呢種中年中產，出來話「跪嘅唔應該係後生仔」「對唔住，我哋應該早廿年出來行」等。
四，話說我呢代人，即係大概七十年代中到八十年代初出世嘅一代，可以話係見證過香港無論係文化抑或經濟最黃金嘅日子，但與此同時亦都經歷過 8964 同過渡期嘅「米高峰外交」。
五，其實我呢代人當中，有唔少都相對政治冷感。舉例講，我讀大學個幾年（利申：我去咗米國讀），好似話學生會連搵人上庄都有難度。到我哋出來做嘢，又咁啱一次過遇到亞洲金融風暴、科網股泡沫同爆破。我自己同溫層入面，朋友偶爾都會講下時事政治，但主要都係「Stephen」（點解？自己搵）
六，後生我哋十幾年嘅，我知道佢哋好不屑我哋呢種經濟動物嘅享樂主義。以前我老師 Ronald Inglehart 教落，社會由一窮二白到富庶小康，經歷唔同成長環境長大嘅人，價值觀略有不同。而且價值觀響成年後會相對穩定，唔會輕易因為一時三刻嘅事出現根本轉變。
七，即係話，由六至廿歲成長階段嘅經歷，即係所謂嘅 Formative Experience，未來幾十年都會影響我哋對身邊嘅人同事嘅判斷。好似細我十幾年嘅（即係所謂嘅 80/90 後）佢哋成長經歷入面見到資本主義嘅不穩定，同時又見到特區政府嘅「廢」，令佢哋唔信市場，但同時亦唔信政府。
八，佢嘅唔信政府，認為因為有官商勾結；所以佢哋要透過普選去改變遊戲規則，進行財富再分配。
九，不過，80/90後，無論人數抑或跨度，都不如之前幾代人闊，所以雖然佢哋更積極做倡議同參與社會運動，始終都有一定局限。但論述上面，佢哋叫我呢種人做「港豬」，我哋又回敬佢哋做「廢青」。
十，如是者，又過十年；左翼都叫做成功爭取咗一啲政策，我哋亦都叫做賺多兩個錢。嘿，點知，就好似「復仇者聯盟」咁，最終大佬原來唔係 Hydra，而係外星人。
十一，2012年反國教到2014年雨傘運動，左翼都有參與，但好快畀人笑係「左膠」。唔好意思，新一代嘅議題，已經唔係財富再分配，而係財富唔好畀人再分配，香港唔好被規劃。
十二，有人話2014年雨傘運動失敗，但我見到係本土主義抬頭。北京同特區政府，好簡單咁將本土等同港獨，但事實上，本土主義好多諗法，都係希望「香港唔好點點點」，但如果問佢哋嘅理想國呢，坦白講都係有些少含糊。不過，唔緊要，從經驗主義嘅角度，冇理想國藍圖唔係一件壞事。
十三，當我哋以為，香港精神有繼承者，我哋可以繼續專心搵錢。嘿，又搞一場 2019 流水革命。呢次終於將咁多個世代，光譜嘅兩邊，全部串連埋一齊。
十四，今日 Facebook 見到，有間中學，唱國歌嘅時代，學生用更大聲唱 Do you hear the people sing ；我唔會因為佢哋唔唱義勇軍進行曲而嬲嬲豬。不過都要講多句：我個代人係海闊天空呀。唔緊要，每代人都有自己嘅主題曲。
十五，有人話，政府之後會搞學校，推國教。我會話，想流水不斷你就推啦。我好肯定咁講，今日 20 歲以下嘅一代人，絕大多數都應該唔聽呢個政府支笛。好簡化咁講，政府同一整代人結怨，可見將來都化解唔到。
十六，講返我呢代人。正如之前所講，人嘅價值觀其實相對都幾穩定，經濟動物享樂主義，見到勢色唔對，抗爭之餘都會搞移民，但有得走，又唔一定即刻走。
十七，我唔敢代表所有人講，但以我目測，我呢代人唔怕對手奸，但絕對唔容忍官員廢。邏輯係：若然我輸畀對手，係因為我蠢，我貪，冇嘢好講，下次學精啲。但若然政府廢呢，唔通我就同你鬥廢咩？
十八，所以，林鄭最初以能吏嘅形象見人，其實都唔少人覺得佢都可以接受；依家露晒底牌，恐怕唔下台都唔駛旨意有機會翻盤。
十九，嗯，究竟仲有咩人會想做下屆行政長官呢？
