《你到底要一個點樣嘅頒獎禮呢》陳心遙
《信報》2018年1月3日《視線所及》專欄
而家是但一個香港人都會好似專家咁走出嚟講：所有樂壇嘅頒獎禮都係造馬，都係分豬肉，都係唱片公司同電台夾埋傾掂晒數嘅。雖然冇錯，但咁講同話「貪念係人嘅本性」、「地球永遠都唔會和平」冇乜分別；於事無補嘛。
作為受眾，你想要一個點嘅頒獎禮？你做乜想要一個頒獎禮？我成日話電台搞一次頒獎禮，都係玩緊平衡緊四條邊嘅「踩鋼線」，要同時兼顧唱片公司、歌手、觀眾同傳媒嘅需要。即係又擺平唱片公司嘅利益，等佢哋同事證明工作有成果；對出席歌手們要有成就感，所謂有「位」俾佢哋好好表演或加分；對觀眾要場騷好睇，又唔會太長又唔會太悶，結果盡量都要有啲說服力；對傳媒要佢哋第二日有功課交，個騷有焦點，有Talking Points。喺電台心目中，一個成功頒獎禮就係咁。仲未計商營機構要照顧埋廣告客戶。
但對於受眾自己，先唔再細分你係真金白銀買歌買Concert飛嘅Fans定係YouTube聽就評論嘅「聽眾」，頒獎禮對你嚟講係乜？
係一壇聽朝同同事、同學吹水嘅談資？
定係一個你觀察樂壇發展大勢嘅風向球？
定係你認真了解「香港流行音樂」嘅指南？
如果係中間，Okay，電台再離譜都唔會唔忠於一年內同唱片公司落力催谷嘅歌曲同歌手，雖然而家網絡主導，但同主流媒體其實係互相影響。無論係佢哋合力谷到好多人聽，定係群眾壓力逼到主流媒體認同，得獎嘅歌同人都大概真係現在最流行嘅一批嚟。
如果係後者，Sorry，我會建議你不如留意網絡嘅各個樂評人嘅年終推介更好，上網聽串流或者購買收藏，你先會知原來香港真係有好多所謂「獨立」嘅歌手同樂團，有萬花筒一樣嘅音樂類型、視野同歌詞內容俾你選擇，如果啱聽，你根本唔需要在意佢紅唔紅，電台播唔播，同你最Friend嘅同事、同學認唔認同，你默默課金支持，希望佢有下一首歌、下一個Concert出現就好。
如果係前者，唉，咁你咪開開心心睇坤哥霧氣眼鏡，或者霆鋒單線Solo咪夠囉，何苦仲要繼續埋怨「十首歌冇一首聽過」、「啲新人舊人我都唔知乜水嚟」呢？不如日日上網Loop「1986年十大勁歌金曲頒獎典禮」懷緬過去仲開心啦，係咪？
我唔係要為電台辯護。我係想話，樂壇同影壇同政壇都係一樣，係經濟、係文化也是政治，即使力量微弱，上面又造馬又立立亂咁，你嘅選票、戲票、演唱會門票，最重要係鈔票，依然係最有影響力嘅，Right？
#你到底要一個點樣嘅頒獎禮呢 #叱咤樂壇 #十大中文金曲 #勁歌金曲 #新城勁爆 #香港樂壇 #獨立音樂 #信報 #陳心遙
